Bihar egingo dute ikasturteko azken udal osoko bilkura
Orotara hamaika puntu izango ditu asteazkeneko hitzorduak; tartean, bi mozio. Horietako bat EAJk aurkeztu du, eta EH Bilduk bestea.
Bihar (hilak 29, asteazkena) egingo dute Oiartzungo Udalean uztaileko udal osoko bilkura, 18:00etan hasita. Abuztuan plenorik egongo ez denez, biharkoa izango da ikasturteko azken hitzordua, eta orotara hamaika puntu izango dituzte mintzagai; tartean, bi mozioa. Lehena Ertzaintza eta udaltzaingoen aurkako mehatxu, jazarpen eta seinalatzea gaitzestea eta bizikidetza demokratikoaren aldekoa da, EAJk aurkeztutakoa.
Bigarrena, berriz, EH Bilduk aurkeztutakoa da, eta Oiartzun udalerri euskalduna izanik arnas gune bilakatzeko beharrezko pausuak emateko hartu beharreko erabakien proposamena da.
Alabaina, hona hemen udal osoko bilkurako puntu guztiak, zerrendatua:
- Aurreko batzarrari dagokion akta onartzea.
- EAJ-PNV taldeak aurkeztutako mozioa: Ertzaintza eta udaltzaingoen aurkako mehatxu, jazarpen eta seinalatzeak gaitzetsi eta bizikidetza demokratikoaren aldekoa.
- EH Bildu taldeak aurkeztutako mozioa: Oiartzun udalerri euskalduna da, eta arnas gune bilakatzeko beharrezkoak diren pausoak emateko hartu beharreko erabakien proposamena.
- Lezoko, Pasaiako eta Oiartzungo Udalen eta Batuz/Emaus gizarte fundazioaren arteko lankidetza hitzarmena, gizarte bazterkeria egoeran edo arriskuan dauden pertsonentzako eguneko arreta zentroan zerbitzu berritzailea garatzeko.
- Udalak eta Oiartzungo Udal Ikastola Partzuergoak 2-3 urteko gelen hezkuntza baimenari uko egitearen ondorioak 2027ko irailaren 1era atzeratzea.
- Lanbarren parke logistikoko Arkotz eta Arañaburu kaleen (Oiartzun) eta AP-8aren arteko ezpondaren aldizkako azterketa geoteknikoaren zerbitzu kontratua hutsik deklaratzea.
- 2026rako zerga ordenantzaren bigarren aldaketa: ibilgailu elektrikoak kargatzeko puntuen erabileragatiko prezio publikoa ezartzea.
- Berri ematea: 2026/02 kreditu aldaketa.
- Berri ematea: 2026/07 kreditu aldaketa.
- Beste organoen jardueraren jarraipena.
- Eskariak eta galderak.
