Jai batzordeak Xanistebanetako egitaraua argitaratu du
Jaiak abuztuaren 2an hasiko badira ere, aurreko egunetan zenbait jarduera izango dira herrian jai giroan murgiltzen hasteko.
Eta, bai iritsi da momentua. Dagoeneko esan daiteke Xanistebanetako atzera kontura hasi dela. Hori horrela, jai batzordeak aurtengo egitaraua aurkeztu du.
Abuztuaren 2an lehertuko da festa, baina aurreko egunetan zenbait hitzordu izango dira herrian; hala nola, hilaren 31ko Harribeltzaren kontzertua. Era berean, abuztuaren 1ean, Oiartzun 2026 urtekariaren aurkezpena egiteaz eta kartel lehiaketako sariak banatzeaz gain, Soinuenea Herri Musikaren Txokoa omenduko du udalak. Egun berean, 18:30ean hasita, joko garbi eta XV. eskuzko pasaka txapelketa herrikoiaren finalak izango dira, eta 19:00etan, berriz, Aitor Txiki areto futboleko finala ere izango da.
Aurten abuztuaren 2a igandea izanik, festa egun bat aurreratu eta txosnetan kontzertuak izango dira abuztuko lehen egunean: txosnagunean Naxker eta DJ Aiakate ariko dira, eta Zimitiyoan, haatik, DJ Infernu.
