Abuztua gorabeheratsu hasi dute
Emakumezkoen ontziak zazpigarren eta bosgarren egin du larunbateko zein igandeko estropadetan; gizonezkoen ontziak, berriz, puntuak pilatu ditu Kantabrian.
Bost bandera besterik ez dira falta denboraldia amaitzeko. Abuztuko lehen asteburuan Hibaikako bi ontziek ez dira nahi bezain fin aritu arraunean. Euskotren ligari dagokionez, emakumezkoen ontziak zazpigarren eta bosgarren egin du larunbat zein igandeko estropadetan.
Larunbatean, Santurtzin izan ziren Ibaizabal ibaian, eta lehenengo txandako hirugarrenak izan ziren. Sailkapen orokorrean, berriz, azkenaurrekoak izan ziren, Donostiarrak bi puntuko aldea murriztu zuen playofferako kanporaketak saihesteko duten borrokan. Igandeko estropada Lekeition izan zuten, eta larunbatekoa ahaztu eta maila hobean aritu ziren. Lehenengo txandan Donostiarraren atzetik helmugaratu ziren, eta azkenean, sailkapeneko bosgarrenak izan ziren. Bi estropada hauek jokatuta bost estropada faltako zaie playoffak saihesteko helburua lortzeko, egun seigarrenak dira 35 puntu eskuratuta, zazpigarrena den Donostiarrarengandik zortzi puntura. Datorren asteburuan, Ondarroan eta Hondarribia izango dira.
Gizonezkoen ontzia KAE 1 ligako bi estropada izan ditu Kantabrian, Pedreñan eta Santanderren. Larunbatean, lehenengo txanda irabazi zuten Lapurdirekin lehia oso estua izan ondoren. Helmugan txandako irabazleak izan ziren ehuneko gutxigatik. Balio handiko puntua izan zen, denboraldiko helburua lortzeko bidean. Atzo, berriz, zortea ez zuten aldekoa izan. Lehenengo txandako hirugarrenak izan ziren Orio B-rengandik segundu bakar batera. Lapurdik, berriz, larunbatean galdutako puntua eskuratzea eta sailkapen orokorrean berdintzea lortu zuen. Horrela, bi ontziak 51 punturekin daude. Errenteriarrek argi dute zein den datozen estropadetarako hobetu beharrekoak, eta bederatzigarren postuari eusteko.
Datorren asteburua berezia izango da, etxeko estropada jokatuko baitute. Larunbatean, Hondarribian izango dira; eta igandean, berriz, Oiartzun ibaian izango dira erlojupekoan, Errenteria Hiria banderaren bila.
