50. urteurrenean, arrakasta izugarria
Aurtengo xanistebanak memorian gordeta edukiko du Elizalde Eskolako komunitateak; tabernatik 3.500 lagun baino gehiago pasa dira.
Brindisean herritar ugari bildu ziren.Elizalde Eskola Urte borobila da 2026 Elizalde Eskolarentzat. Oiartzungo eskolak 50 urte bete ditu aurten, eta urtean zehar ekitaldi ugari antolatu ditu. HITZAk Elizalde Eskolaren 50 urteak errepasatzen dituen erreportajea ondu zuen maiatzean. Xanisteban Jaiekin bat eginez, 50 urteak ospatzeko brindisa egin zuten txupinazoaren ondoren. Bertan, dozenaka lagun bildu ziren, eta elkarrekin topa egin zuten: “Izan ziren, gaur garen eta izango direnen alde”. 2004an xanistebanetako lehen taberna sotrtu zuten gurasoak omendu zituzten, eta 50. urteurreneko urrezko logotipoa duen kamiseta bana oparitu zieten.
Hilaren 2an, tabernak ateak ireki zituen eta festak iraun duten egunetan 3.500 lagun baino gehiago pasa dira bertatik. Brindisa une hunkigarria izan bazen ere, honek ageria uzten du bizitako emozioak, auzolanak eta komunitate-senak zenbatekoa balioa duen. Afariei dagokionez, egunero tabernan 700 pertsonak afaldu dute. Hori posible egin. duten boluntario eta familia orori “eskerrik beroenak” eman nahi izan diete. Baita tabernak antolatzen duen bingo berezirako opariak donatu dituzten herritarrei ere.
Bestalde, mende erdia ospatzeko zozketa berezia antolatu dute aurten. Zozketako zenbaki irabazlea 2.446 izan da, eta zehaztu dute, Errenteriako bizilaguna dela aurtengo irabazlea.
“Eskolako tabernak eta antolatutako ekitaldiek marak guztiak hautsi dituzte herriko festetan”, harrotasunez adierazi dute. Abuztura arte ekitaldi ugari antolatu arren, irailaren 12rako beste hitzordu bat iragarri dute, 50. urteurrenak aurrera jarraitzen baitu. Larunbat horretan, Kulturaniztasunaren Eguna antolatuko dute. Laster argitaratuko dute egunean zehar egingo dutenaren informazioa.
