"Azken sutea izan dadila"
2018an ere txatar tontor batek su hartu zuela gogoraraziz du Eguzki talde ekologistak, eta ordutik ez dela arazoari benetako irtenbiderik eman.
Joan den ostiralean Pasaiako portuan izandako sutearen harira, Eguzki talde ekologistak ohar bat elkarbanatu du herritarrekin. Ostiral goizean izan zen sutea, Lezoko kaian txatar tontor batek su hartu zuen. Suteak berehalako neurriak hartzera behartu zituen erakundeak, eta eguerdira arte leihoak itxi eta konfinatzeko gomendioa eman zieten inguruko herritarrei. Eguerdirako kontrolatutzat eman zuten sutea.
Talde ekologistak gogorarazi du “ez dela lehen aldia”. 2018an ere txatar tontor batek su hartu zuen, ke zutabe handiak eraginez. Gertakari hori argitzeko prozedura judizial bat ireki zela gogorarazi du taldeak, baina, “ingurumen eta osasun arloan askotan gertatzen den bezala”, urte askoren ondoren oraindik ez dela “izapide horien emaitza ezagutzen” salatu dute ekologistek. “Oraingoan bai, espero dugu erakunde eskudunek beahr diren neurriak har ditzatela horrelako gertakariak saihesteko. Gaur txatar tontorraren sutea izan da, baina Pasaiako portuaren inguruko biztanleei egunero eragiten diete portuko zamalanetatik askatzen diren partikula esekien isuri barreiatuek, pertsonen osasunari eta ingurumenari oro har erasotuz”, deitoratu dute.
Horrelako eraginak saihesteko neurri eraginkorrak badaudela diote, eta bestela, alternatiba bakarra “lan horiek hirigune handietatik, hala nola Pasaiatik hain hurbil ez dauden beste portu instalazio batzuetara bideratzea izango” litzatekeela.
Eskumena duten agintarien “ekintza gabezia” da, taldekoen arabera, “atmosfera kutsa dezaketen jarduera horien kontrol eta zaintza faltaren eta, beraz, horrelako gertakariek sortzen dituzten ondorioen arrazoi nagusia”. Gainerako erakunde publikoek ere euren erantzukizuna badutela erantsi dute, “ez baitute presiorik egiten”. Osasun publikoa eta ingurumenaren zaintza bermatzeko “beharrezko neurriak” eskatu dituzte.
