Frontoiko Zumardiko mendi magalaren azterketa geoteknikoa abiatuko dute astelehenean
Maiatzean San Pedron gertatutako luizia argitu eta zer nolako egonkortze lanak definitu behar diren jakiteko azterketa abiatuko du Pasaiako Udalak.
Iragan maiatzean euri jasek luizia eragin zuten San Pedroko Frontoiko Zumardiako mendi magalean. Ordutik, behin-behineko lanak egin dituzte bertan, eta orain “irtenbide integrala emateko” azterketa abiatuko du Pasaiako Udalak. Datorren astelehenean (hilak 31) azterketa geotekniko integrala hasiko duela jakinarazi du erakundeak.
Luizia gertatu zenetik, bertan lanean aritu direla dio erakundeak, “ingurua egonkortzeko eta kaltetutako pertsonen etxeratzea nahiz segurtasuna bermatzeko”. Lehen fase batean behin-behineko jarduketak egin zituzten, udalaren lehentasuna izan baitzen “familiak ahalik eta lasterren itzultzea”. Abuztu erdialdean sinatu zuen Teo Alberro alkateak etxeratze dekretua, jarduketa horiei esker.
Lehen fase hori bukatuta, orain behin betiko lanak definitzeko beharrezkoa den azterketa geoteknikoa hasiko du udalak. Erakundearen arabera, ikerketa hori “beharrezko aurretiazko urratsa da lurraren behin betiko egonkortze lanak definitu ahal izateko”.
Ikerketa honetarako, zundaketa makina duen garabi bat sartuko dute eremura. Honek magalaren azterketa geotekniko integrala egingo du, “lurzoruaren eta magalaren egoera zehatz-mehatz ezagutzeko eta egonkortzeko beharrezko neurriak definitzeko”. Astebete inguru ariko dira zeregin horretan. Lortutako datuen arabera, besteak beste, magala egonkortzeko zer neurri hartu beharko diren zehaztuko du udalak. Azterketa bukatu ondoren, udalak informazio zehatzagoa emango du.
Aipatutako lan hauen ondorioz, astelehenean aparkaleku jakin batzuk libre utzi beharko dira, makinarien sarbidea bermatu eta zundaketa lanak segurtasunez egin ahal izateko. 10-20 aparkaleku ingururi eragingo die horrek, hain zuzen, kale hauetan: Marinelen kalea, Espinosa de los Monteros eta Daniel de Castelao, eta Zamateteko aldapa. Udaltzaingoak aparkaleku hauek balizatuko ditu, astelehen goizerako libre utzi beharko baitira.
