Burrunbaz beteta hasi dira santakrutzak
Atzo (igandea) hasi ziren 2026ko Santakrutz Jaiak. Arratsaldeko txupinazoa eta gaueko elkarteen danborradak izan ziren unerik gorenenak.
Elkateetako danborradak, atzo gauean, Gurutze Santuaren plazan. 
Murixkako dantzariak, atzo, ‘Agurra’ dantzatzen. Argazkia: Lezoko Udala.
Atzo (hilak 13, igandea) hasi ziren ofizialki 2026ko Santakrutz Festak. Noa Zabaleta eta Irai Gomez alkate txikiak arduratu ziren 19:00etan lepo beteta zen Gurutze Santuaren plazan zirenei festa bikainak izan daitezen eskatzea lezoarrei, euskaraz eta errespetuan. Ondoren Murixkako dantzariek Agurra dantzatu, eta Lezo herria ereserkiari ekin zioten Tomas Garbizu Musika Eskolako bandak eta Munttarreko txistulariak. Eguraldi bikaina atzo, santakrutzen lehen ordu ofizialen lagungarri.
Txupinazoaz gainera, atzoko gunerik indartsuena herriko elkarteen gaueko danborradena izan zen. Lehenik bere bidea egin zuten Allerru, Altzate, Ixkulin eta Tiñelu elkarteetako segizio burrunbatsuek; ondoren Gurutze Santuaren plazan elkartu ziren denak. Txoria txori abestu zuten danborrari denek han ziren herritarren koruekin, eta memoria historiko ariketa ere egin zen: atzoko egunez, 1936an, indar faxistek Lezo hartu zuten. Festetan ziren orduko hartan ere lezoarrak; festa gogoa, baina, izu eta ezinegon bilakatu ziren. Plazako danborrarien bilkuran gogoan izan zuten duela 90 urteko hura.
Noa Zabaleta eta Irai Gomez alkate txikiak, atzo, Mikel Arruti alkatearekin pregoi betean. Argazkia: Lezoko Udala.
Gaur egun handia dute Lezon, Santakrutz Eguna, I-14 Eguna. Egunaren ardatza tartekoen, arrantzaleen eta adinekoen bazkariak izango dira. Baina badira ekitaldi gehiago, tartean 17:30ean Koldobike Gezala pilotalekuan hasiko diren Josetxo Etxandi 50 Oroitaldiaren afizionatuen partidak. Gaurko egitarau osoa beheko koadroan ikus daiteke
Jarraian, atzoko danborradako irudi eta bideoak, lezoarrek HITZAra bidalitakoak.
2026ko santakrutzak. Gurko egitaraua.
Gaur (hilak 14, astelehena). Santakrutz Eguna.
- 10:00. Munttar Lezoko Txistulari Elkarteko musikarien diana.
- 10:00. Bizitzaren alde pedalei eragin jarduera eta haurrentzako pintura tailerra, Gipuzkoa Minbiziaren Aurka elkartearen eskutik, Karlos Saldise plazan.
- 11:00. Perkusio tailerra Gurutze Santuaren plazan.
- 11:00. Meza nagusia Santo Kristo elizan.
- 12:00. Herri kirolak Gurutze Santuaren plazan. Aizkolariak: Iker Vicente, Ibai Soroa, Julen Alberdi eta Ugaitz Mugerza. Harri jasotzailea: Mikel Lopetegi.
- 12:30. I-14 Egunaren topaketa DJ Bullek girotua, Karlos Saldise plazatik hasita.
- 13:30. I-14 Eguna hasteko txupinazoa Gurutze Santuaren plazan. Herri argazkia aterako da.
- 14:00. Jubilatuen bazkaria Bekoerrota kiroldegian
- 14:30. I-14ko herri bazkaria Lezo Herri Eskolako patioan. Bazkalostean, Andoni Ollokiegiren emanaldia.
- 16:30. Haurrentzako puzgarriak Goiko Plazan.
- 17:30. Josetxo Etxandi L. Oroitaldiko federatuen finalak Koldobike Gezala pilotalekuan.
- 18:00. Erraldoi eta buruhandiak, Lezo Herri Eskolatik hasita.
- 18:30. Jaixkipe txarangarekin kalejira, Lezo Herri Eskolatik.
- 20:30. Tapia eta Leturia Band, Karlos Saldise plazan.
- Jarraian. DJ Reibax Karlos Saldise plazan.
- 22:00. Zenzensuzkoa Gurutze Santuaren plazan.
