Trafiko aldaketak Antxon eta San Pedron
Asteburuan sanfermin eta sanpedro txikiak ospatuko dira, eta jarduera batzuek eragina izango dute bi barrutietako trafikoan.
Iazko sanferminen hasieran jasotako irudi bat. Asteburuan (hilaren 25etik 27ra) sanfermin eta sanpedro txikiak ospatuko dira Antxon eta San Pedron, eta egitarauetako zenbait jardueren ondorioz, trafiko aldaketak izango dira bi barrutietan.
Antxori dagokionez, Kupeldegi kalea Hamarretxetarekin gurutzatzen den puntuan hesi bat jarriko du Udaltzaingoak kaleko jarduerak dauden bitartean, bertan oinezkoei lehentasuna emateko. Ibilgailuek Gelasio Aranburu kalea erabili ahal izango dute, eta jarduerak bukatzean berrezarriko da trafikoa, kale nagusitik.
San Pedron haurren triatloia egingo da larunbat goizean (hilaren 26an), 11:00etatik 15:00etara bitartean. Proba egin ahal izateko, frontoitik Torreko plazara doan errepidea moztuta egongo da trafikoarentzat. Hortaz, Arraunlariko aparkalekuan eta inguruan dauden ibilgailuek ezingo dute bertatik atera probak irauten duen bitartean. Triatloiaz gain, larunbat arratsaldean haurren arrantza txapelketa egingo da, eta Torreatze kalea moztuta egongo da 15:30etik 23:00etara. Soilik garajeetako erabiltzaileek izango dute baimena sartzeko.
