Alberro: "Aldundiak E03an atzera egin izana albiste ona da, baina ez nahikoa"
Donibanetik ospitaleetara doan lineak ohiko ibilbidea mantenduko du, baina E07 eta E09 lineen murrizketak ere bertan behera uztea eskatu du alkateak.
Pasaiako Udalak baikor baloratu du aldundiak Donibane eta ospitaleak lotzen dituen E03 linearen ibilbidean aurreikusitako aldaketa birpentsatu izana. Hasiera batean, linea hori Errenteria-Oreretako hainbat auzotatik pasatzea aurreikusi zuen aldundiak, “eta horrek nabarmen luzatuko zuen Donibanetik ospitaleetara joan behar duten herritarren bidaia”. Mugikortasun diputatuak egindako adierazpenen arabera, aldundiak ibilbidea lehengoratzea erabaki duela jakinarazi du udalak, “herritarren presioari eta udalak egindako idatziei esker”.
Teo Alberro alkatearentzat “albiste ona” da aldundiak erabakian atzera egin izana, sanjuandarrek ospitaleetara duten konexioa ez delako okertuko. Alkateak baietsi du erabaki horren atzean herritarrek azken egunetan helarazitako kexak eta eskaerak daudela, baita udalak egindako presioa ere, Alberrok berak gutun bat bidali baitio Azahara Dominguez Mugikortasun diputatuari. Udalak, gainera, autobusen emakida berriari ere ekarpen formalak egin zizkion 2024an.
E03 linearen ibilbide aldaketa albiste ona bada ere, hori nahikoa ez dela adierazi du alkateak, E07 eta E09 lineei eragiten dieten murrizketak ere bertan behera uztea eskatu baitu. “E09 linearen maiztasun murrizketak eta E07 linearen ibilbide eta konexio aldaketek eragin zuzena izango dute oraindik ere pasaitarren eguneroko mugikortasunean”. Horrez gain, ordutegi berrien konplexutasunak bizilagunen artean kezka eragin duela zehaztu du Alberrok, “maiztasun egonkorrak izan beharrean, eguneko tartearen arabera etengabe aldatzen baitira”. “Ordutegi horiek ulertzea zaila izan daiteke, bereziki pertsona helduentzat, eta horrek garraio publikoaren irisgarritasuna bera oztopa dezake”, adierazi du alkateak.
“E03arena urrats bat da, eta pozten gara eman izanaz, baina ez da nahikoa. Pasaia osorako garraio publiko duina eta barrutien arteko eta Donostiarekin nahiz eskualdearekin lotura egokiak bermatu behar ditugu. Horregatik, beste bi lineen inguruan ere atzera egitea eskatuko diogu berriro aldundiari”, baietsi du Alberrok.
Udalak bilera hitzartua du datorren astelehenean Azahara Dominguez Mugikortasun diputatuarekin. Bilkura horretan, udalak berriro azalduko du “E07 eta E09 lineetan aurreikusitako aldaketak ez direla bateragarriak Pasaiako mugikortasun beharrekin”. Hortaz, neurriak berriro aztertzeko eta atzera egiteko eskatuko diote aldundiari: “E03arekin gertatu denak erakusten baitu aldaketa posiblea dela, eta aukera dagoela oraindik pasaitarren mugikortasuna nabarmen okertuko duten murrizketak ez aplikatzeko”.
