Ikasturteko lehentasunen artean, etxebizitza plana
Udalak ikasturteko lehentasunak markatu ditu. Bost dira, eta Oiartzun herri bizia, bizigarria, jasangarria, berdinzalea eta euskalduna izatea da horien helburua.
Oiartzungo Udalak honako helburua ezarri zuen legegintzaldi hasieran: Oiartzun herri bizia, bizigarria, jasangarria, berdinzalea eta euskalduna izatea. Ildo beretik jarraitu nahi dute, eta horretarako, zenbait lehentasun markatu dituzte ikasturte hasierarekin batera.
Orotara, bost lehentasun zehaztu dituzte, eta lehenengoa etxebizitzari dagokiona da. “Oiartzuarren etxebizitza beharrak entzun eta bakoitzari dagokion erantzuna emateko etxebizitza bulegoa” irekiko dute, eta bertan etxeren baten bila dabilenari zein etxejabeei emango zaie informazioa.
Era berean, oroitarazi dute Oiartzun tentsio handiko etxebizitza eremu izendatzeko beharrezko dokumentazioa udaberrian aurkeztu zutela, eta urtea amaitzerako izendapena eskuratzea aurreikusten dela.
Udal musika eskola berria ere bada lan ildoetako bat, Ibargaingo eta Soinueneako lantaldearekin erreleboa prestatzeko lanean ari baitira. Gainera, beharrezko baimenak eskuratzeko, zerbitzua antolatzeko zein egoitza topatzeko lanetan jarraituko dutela diote.
Zaintza diagnostikoa eta indarkeria matxistaren aurkako plan integrala ere bai
Aipatutako lan ildoez gain, udalak jakinarazi du Hezkuntza Sailarekin Elizalderen fatxada eta teilatua berritzeko markoa adostua dutela, eta udazkenean hitzarmena sinatzea aurreikusten dutela.
Hots, aurreratu dute udazkenean zaintza arloko hutsuneak detektatu eta zerbitzua hobetzen joateko zaintza diagnostikoa aurkeztuko dutela. Alabaina, indarkeria matxistaren biktima izan diren emakumeak artatzeko plan integrala lantzen ere amaituko dutela diote. Gainera, herrira etorri berri diren herritarren inklusioa errazteko harrera gida ere aurkeztuko dute.
Azkenik, Oiartzungo Udalak gogorarazi du udaberrian eskualdeko garraio astunari buruzko azterketa eta egoera arintzeko neurri zehatzak proposatu zituztela eskualdeko gainerako udalekin batera, eta elkarlanerako markoa lantzen jarraituko dutela diote.
Gainerako industriaguneak berritu ostean, datozen urteetan Lanbarrengo industriagunea eraberritzeko proiektua ere udazkenean landuko dutela diote.
