Osasunaren aldeko eta portu zikinaren kontrako herri bultzada
Dozenaka herritar bildu dira Lezoko plazan portuaren jarduteko era gaitzetsi, eta osasuna berma dadila eskatzeko. Urriaren 3ko manifestaziora deitu dute.
Atzoko herri argazkiaren une bat. Herri argazkia, elkarretaratzea, asanblea eta deialdi bat egin zituzten atzo Lezon. Abuztuaren 21eko suteak eragindako ezinegon eta haserrea bideratzeko herritarren ekimenez sortutako mugimenduak irmo darrai halakorik berriz ere gerta ez dadin mobilizatzen, eta atzokoa testuinguru horren barruan kokatu behar da. Gurutze Santuaren plazan bildu, esku artean den informazioa zabaldu, eta urriaren 3an (17:00etan, Gurutze Santuaren plazatik) Lezon egitekoa den manifestaziorako deialdia ofizializatu zituzten atzokoan. Herri argazkian izan ziren gehienak lezoarrak izan ziren, baina badiaren inguruko beste herrietako lagunak ere hurbildu ziren Unibertsitateraino.
Asanblean hainbat informazio eman ziren. Hasteko eta behin, Kaialde inguruan den kutsadura neurtzeko gunearen gaineko azalpenak eman zituen partaide batek. Esan zuen datuak bildu bai, baina horiek era nahasgarrian zabaltzen direla: egunero, gunean diren gailuek neurtzen dituzten datuen batez bestekoa ematen dela jakinarazi zuen, eta ordu edo une jakin batean izan daitekeen kutsaduraren neurri zehatza ez dagoela biltzerik. Gainera, kutsadura partikula txikienak (pertsonek arnasketa bidez gorputzera sartzen dituztenak) ez dituela neurtzen azaldu zuen, bai ordea partikula handiagoak, horiek zailago direlarik gorputzen barruraino iristea.
Hala ere, unean-uneko datu zehatzik ez izan arren, neurgailuaren datuetara sarbidea izan duen herritarrak azaldu zuen Lezoren antzera portuen inguruan, edo jarduera industrial handiko eremuen ondoan diren Euskal Herriko beste udalerri batzuekin alderatuta, Lezoko kutsadura indizea nabarmen handiagoa dela.
Bestalde, beste kide batek udalarekin egindako hartu-emanen berri eman zuen. Azaldu zuen Lezoko Udalak ikerketa abian duela, eta ia-ia osatua duela. Gainera, kutsadura denbora errealean neurtzeko gailua jartzeko eskaera eginda dagoela nabarmendu zuen, “kontrola zorrozteko”. Kutsadura kasuak daudenean protokolo bat badela azaldu zuen, eta hori aplika dadin zer egin behar den argibideak ema zituen. “Portuaren estrategia da jasotzen dituen deiak-eta gutxiestea, eta kasurik ez egitea. Hala uste dute kexatzen diren herritarrek amore emango dutela”.
Portuaren eremua erabiltzen duten enpresen gainean, azaldu zuen hainbat zamarekin lan egiteko ez dutela lizentziarik, tartean direlarik portura kutsatuta hel daitezkeen salgaiak: “Horiek maneiatzeko lizentzia ematea Jaurlaritzako Ingurumen Sailari dagokio. Enpresa horiek ez dute lizentziarik”. Bai 2018ko zein abuztuaren 21eko txatar mendixketan izandako suteek ezaugarri komun bat dutela adierazi zen: autoen txatarra da, bereizi eta sailkatu gabekoa, eta horren barruan erregaia eta bateriak daude besteak beste.
Gaintxurizketa
Portuaren beraren jardunaz gain, Gaintxurizketako eremu logistikoaren gaineko informazioa eman zuten asanblean, Portu lehorra deritzon horrena. Azaldu zuten horren gaineko kontsulta txostena jaso dutela Lezoko Udalak, eta hilabeteko epea dagoela horren gaineko alegazioak aurkezteko. “Txosten horretan ez dute ezer kontuan hartu, ez ingurumen arlotik, ez eta han bizi eta lan egiten duten interesen arlotik. Bakarrik plataformari egin diote men”. Hala, plataforma horren kontrako alegazioak aurkezteko sinadura bilketarekin hastear direla azaldu zuten.
Jarraian, atzoko elkarretaratzearen hainbat irudi.
