Kluba hazten eta kirol proiektua sendotzen jarraitu nahi du Donibanek
Iazko denboraldi historikoaren ondoren, kantxetara bueltan dira Donibane Eskubaloiako taldeak. Larrabidek hiru partida jasoko ditu larunbatean.
Ikasturtea hastearekin batera, bueltan dira kirol txapelketak. Iaz Euskadiko txapeldun izan eta Katalunian Lehen Maila Nazionalera igotzeko play-offa jokatu ondoren, Donibane Eskubaloiako gizonen lehen taldeak denboraldia irekiko du larunbatean (urriaren 3an). Arrosek Muskiz jasoko dute Larrabiden, 17:30ean. Iazko denboraldian bizitako guztiaren ondoren, taldeak ilusioz betetako sasoi berri bat hasiko du.
2025-2026 denboraldia historikoa izan zen sanjuandarrentzat. Euskal Ligako txapeldun izan ondoren, Lehen Maila Nazionalera igotzeko play-offa jokatu zuten Gironako Palafrugell herrian. Arrosek ezin izan zuten igoera lortu, baina denboraldi osoan eta play-offean bizitako esperientzia kirol emaitza bat baino gehiago izan zela adierazi du klubak. “Klubak ikusi ahal izan zuen noraino irits daitekeen pausoz pauso eraikitako proiektu bat, jokalariak, entrenatzaileak, zuzendaritza, familiak, laguntzaileak eta zaleak norabide berean bultzatzen dutenean”.
Iazko sasoiak Donibane Eskubaloiaren historiaren parte diren uneak utzi zituela aitortu du klubak, baina, batez ere, aurrera egiteko eta hazten jarraitzeko gogoa utzi zuela. Eta hori da, hain zuzen, 2026-2027 denboraldiko helburu nagusia: kluba hazten eta kirol proiektua sendotzen lagunduko duten pauso txikiak ematen jarraitzea. “Nondik gatozen eta Donibane bezalako klub baten errealitatea ahaztu gabe, asmoa kantxan zein kantxatik kanpo hobetzen jarraitzea da, eta Pasaiako gero eta herritar gehiagok proiektu hau bere sentitzea”.
Larunbateko partidan, Euskal Liga hasteaz gain, iaz “oso garrantzitsua” izan zen zalegoarekin bat egingo dute berriz jokalariek. “Partida erabakigarrietan jasotako babesak erakutsi zuen eskubaloiak giroa, klubarekiko eta herriarekiko lotura eta kirol bizitza sortzeko gaitasuna duela”.
Hori dela eta, klubak pasaitar, familia, eskolako eta klubeko jokalariak, klubetik pasa diren pertsonak eta kirolzale guztiak Larrabidera gonbidatu ditu etxeko lehen partidan taldea babesteko.
“Denboraldi berri bat hasten da. Iaz lortutakoa klubaren historiaren parte da dagoeneko, baina, aldi berean, aurrera egiten jarraitzeko abiapuntua ere bada. Hazten jarraitu nahi dugu, pausoz pauso, Donibanetik eta Pasaiarentzat”, zehaztu du klubak.
Asteburu bizia Larrabiden
Gizonen lehen taldea ez da larunbatean Larrabiden kantxaratuko den bakarra, Donibaneko kiroldegiak hiru partida jasoko baititu. 11:30ean gizonen bigarren taldeak Zumaiako Pulpo taldea jasoko du; 15:30ean emakumeen taldeak Elgoibarren kontra jokatuko du; eta bi neurketa horien ondoren, gizonen talde nagusiaren txanda izango da, 17:30ean, Muskizen aurka. Bestalde, jubenil gizonek Hondarribiaren kontra jokatuko dute igandean Hondarribiko kiroldegian, 11:30ean.
Donibane Eskubaloiako taldeen asteburuko partidak
Hilak 3, larunbata
- 11:30: Gipuzkoako Gizonen 2. Lurralde Txapelketa. Donibane-Pulpo, Larrabiden.
- 15:30: Gipuzkoako Emakumeen 2. Lurralde Txapelketa. Donibane-Elgoibar, Larrabiden.
- 17:30: Gizonen Euskal Liga. Donibane-Muskiz, Larrabiden.
Hilak 4, igandea
- 11:30: Jubenil gizonak. Hondarribia-Txingudi/Donibane, Hondarribiko kiroldegian.
