Larunbatean izango da udazkeneko HemenGuk azoka
10:00etatik 13:00etara bitartean Doneztebe plazan elkartuko dira dozena bat postu. Jakiak edota bitxiak bezalakoak erosteko aukera egongo da.
Astelehen arratsaldetan HemenGuk azoka egiten hasi badira ere, leial mantentzen dituzte oiartzuarrek urtaro bakoitzean egiten dituzten azoka bereziak. Udazkenean sartu berritan, bada, iragarri dute dagoeneko larunbatean (urriak 3) izango dela udazkeneko azokaren txanda.
Doneztebe plaza izango da oraingoaren eszenatoki, eta hamabi postu bisitatzeko aukera izango dute herritarrek 10:00etatik 13:00etara bitartean: Arabolaza, Arraztalo, Artexaniak, Elika, Elizalde Herri Eskola, Gezamina, Gure moneta, Kürtöskalács, Larremotx, Masari, Papurrak eta Zituene.
Honakoak dira, hurrenez hurren, gaiak: eztigintza, barazkiak, artisautza, barazkigintza, merchandisinga, ogia, sagardoa, moneta, gozo hungariarra, gaztagintza, bitxigintza, gozoak eta pasta.
