Hamaika plan eta ekintza urria alaitzeko
Garagardo azoka, mendi martxa, tokiko produktuen azoka, bertso bazkari autogestionatua eta beste hainbat ekintzako egitarau oparoa antolatu du Oiartzungo Udalak herriko eragileekin batera.
Oiartzungo 2025eko Gau Beltzeko irudia.Ximun Leturia Lete Oiartzungo Udalak, herriko elkarteekin eta eragileekin batera jarduera beteko hilabetea antolatu du urrirako. Jada “udazkeneko klasikoak” bilakatu diren egitasmoez gain, bestelakoez ere gozatu ahal izango dute herritarrek, egitaraua zabala baita.
“Klasikoen” artean, garagardo azoka egingo dute urriaren 8tik 11ra Madalensoroko plazan, Munanier elkarteak antolatuta. Hilaren erdialdetik aurrera, Kirol Astea programaren baitan askotariko jarduerak egingo dituzte, adibidez, hilaren 27an 11:15ean ginkana seniorra egingo dute Petra Lekuona egoitzan, Zaintzadi eta Abittu elkarteek Petra Lekuona egoitzarekin eta udalarekin antolatutakoa.
Hiru hilean behineko larunbatetan egiten den HemenGuk azoka berezia ere badago agendan, Itturri merkatari elkarteak antolatzen duen haur jolasen arratsaldearekin batera. Urriko azken egunean izango da zita garrantzitsuenetako bat, Gau Beltza, baina aurreko asteetan hura prestatzeko tailerrak ere egingo dituzte.
Udazkeneko klasikoez gain, besteren artean, hainbat hitzaldi izango dira. Adibidez, Arraztalo kontsumo taldeak osasun mentalarekin lotutako bi jardunaldi antolatu ditu, hilaren 8an eta 22an, udaletxeko areto nagusian. Soinueneak eta Luberrik, berriz, ondareari buruzko hitzaldi bana emango dute, hilaren 3an eta 22an, hurrenez hurren.
Kulturari lotutao jarduerak ere ez dira faltako Oiartzunen. Esate baterako, urriaren 4an Kantagiltza egingo dute Antton Valverderekin batera Arizmendieneako lorategian, eta urriaren 23an, aldiz, Mirari Martiarena eta Idoia Torregarai umoregileen bakarrizketa, Landetxe Kultur Aretoan. Bestalde, euskararekin lotuta, Ttur Ttur Euskaltzaleon Bilguneak Euskaltzaleon plaza egitasmoa egingo du hilaren 6an, Landetxen, eta Oiartzungo Gure Eskuk Zazpi Jauziz Herri Bat Oiartzunen festa, hilaren 11n.
Bukatzeko, Elizalde herri eskolak, 50. urteurreneko ospakizunen ildotik, bertso bazkari autogestionatua egingo du 10ean, Girizia elkartean, eta gaueko mendi martxa 24an, Doneztebe plazatik abiatuta.
