Antxo, belaunaldiarteko topagune
1.000 lagunetik gora ari dira parte hartzen Antxoko II. Kinto Egunean; 50 urtetik gorako antxotarrak festan dira gaur.
Antxoko II. Kinto Eguneko bazkaria Arrakastatsua eta berezia oso. Horrelakoa izaten ari da Antxoko bigarren kinto eguna Biteri plaza belaunaldiarteko topagune bilakatu ostean. 1.000 lagunetik gora, 50 urtetik hasi eta 79 urtera arte, hartu dute karpa erraldoia mahaiaren bueltan elkartzeko. Gazteenek, aurten 50 urte bete edo beteko dituztenek zapi berdea zuten soinean; gainontzeko guztiek, gorria.
Eguraldi petralarekin hasi badute ere eguna, Biteri plazan giroa gorenean zegoen bazkalorduan jada. Bertan zirenetako asko, Antxon bizi dira gaur egun ere, baina Antxon jaio, bertan haurtzaroa edota gaztaroa pasa eta handik kanpo bizitzera joandako ugari ere batu dira gaurko ospakizunera.
Eguna, paregabea; hogeita hamar belaunaldi batzeko gaitasuna, mirestekoa; eta menua ere ez nolanahikoa. Euskal Parrilakoak jo eta su aritu dira lanean inor goserik ez gelditzeko: Entsalada, xapua, saiheskia… dena parrilan egina.
Mahai mordoa eta jendea barra-barra; aparteko mahai batean izan dira antolatzaileak. Haien aurpegiak adierazten zuen dena, poza, ilusioa, asetasuna.
Mahaiaren bueltakoak bukatuta, segida izango du festak Pasai Txarangarekin—70. urteurrena ospatu du azken horrek gaur mahaiaren bueltan— eta Joselu Anayak taldearekin. 17:30ean izango da hori.
Gaurko festa handia kopuruz, baina hortik harago, handia asmoz, belaunaldi arteko sare sendoa erakutsi baitu Antxok.
