Domiko eta Erreka proiektuen inguruko informazioa emango dute
Bianditz - Domiko bizirik! elkarteak antolatu du hitzordua hilaren 23rako. 19:00etan izango da Gurutzeko Bizardia elkartean.
Bianditz-Domiko bizirik elkarteak batzar irekia antolatu du hilaren 23rako (ostirala da). Oraingoan Gurutze auzoan izango da hitzordua, eta batzar irekiaren helburua Domiko eta Erreka proiektuen berri ematea da. Bizardia elkartean izango da topaketa, 19:00etan.
Repsol gas eta petrolio enpresa dago bi makro proiektu eoliko horien atzean eta horiek, Oarsoaldea inguruko mendietan eraiki nahi ditu.
Domiko proiektuaren barruan Repsolen planteamendua da Domiko Bianditz-Pagolleta urtegiaren inguruko gailurretan hamabi aerosorgailu jartzea, bakoitzak 6,6 megawatteko gaitasuna izanik, osotara 79,2 megawatteko potentzia jasoz; 205 metroko altuera izango lukete aerosorgailuek. Nafarroako Lesakako eta Goizuetako, nahiz Oiartzungo lur eremuetan altxako lituzkete. Plataforma deitzaileko kideek uste dute aerosorgailu horietatik sortuko den energia garraiatzeko goi tentsioko lineako dorreek, Artikutzako nahiz Aiako Harriko lursailak okupatuko lituzketela Aritxulegiko lepotik pasata Gurutzeko Arkalera jaisteko, beraz, zuzenean eragina izango luke babesgunean zein herrian.
