Domiko eta Erreka proiektuak ez dituztela nahi aldarrikatuko dute
Bianditz-Domiko bizirik! plataformak deituta, bizikleta martxa egingo dute hilaren 15ean Oiartzundik Errenteriara.
Bianditz-Domiko Bizirik! plataformak bizikleta martxa egingo du Oiartzundik Errenteriara hilaren 15ean. Mendiak bizirik. Domiko-Erreka proiekturik ez! Repsol kanpora! lelopean egingo dute martxa, eta 11:00etan Oiartzungo Gurutze auzotik abiatuko dira.
Oiartzundik hurbil bi parke eoliko ezarri nahi ditu Repsol enpresak, eta han sortuko litzatekeen argindarra garraiatzeko lineek inpaktu sakona izango lukete Oarsoaldean. Gaiak ezinegona sortu du eskualdeko herrietan zein inguruetan, eta desadostasuna adierazteko eta egin nahi dutena salatzeko sortu zuten Bianditz-Domiko bizirik! plataforma Oiartzunen.
Kalte handiak
HITZA plataforma sortu berritan zenbait kiderekin elkartu zen, eta hedabideari kontatu zieten Erreka zein Domiko egingo balira ingurumenean “kalte handiak” sortuko liratekeela horien barruan dauden azpiegiturak egiteko. Esaterako, kontatu zuten aerosorgailu bakoitza eta horiek sortutako energia garraiatzeko dorre bakoitza eraikitzeko menditik pista bana egin beharko litarekeela. “Zauriz beteko lituzkete inguruko mendiak, bide horiek egiteko makineria oso astun eta kutsakorra erabiliz”.
Gainera, argindarraren garraiorako dorreak eraikitzekotan, horien ezker-eskuin segurtasun zabalerak ezarri behar izaten dira, 20 bat metrokoak, eta plataformatik diote zabalera hori bermatzeko ziurrenik zuhaiztiak ezabatu beharko liratekeela.
