'Lutxi eta zuhaitza' dokumentala emango dute azaroan Lezo, Oiartzun eta Errenterian
Lander Garro zuzendariaren azken lana da. 1987an gertatutako Lucia 'Lutxi' Urigoitia ETAko militantearen heriotzaren ingurukoa da, testigantzen, familiaren eta adituen ahotsetatik eraikia.
Olaia Aguayo, Urigoitiaren paperean. Zigor Garro Lucia ‘Lutxi’ Urigoitia ETAko militantea 1987an hil zen, 28 urte zituela, Guardia Zibilak ETAko Donostia komandoa desegiteko Trintxerpen (Donostia) gauzatutako operazioan. Azterketa forentsearen arabera, buruan jasotako tiro batengatik hil zen. Haren heriotzak harrabotsa sortu zuen, bi bertsio eraiki zirelako. Guardia Zibilak argudiatu zuen buruz buruko enfrentamendu batengatik izan zela; beste askok, aldiz, legez kanpoko hilketa izan zela salatu zuten.
Lander Garrok zuzendutako Lutxi eta zuhaitza dokumentala kasua argitzen saiatzen da, Lutxiren inguruko hainbat ahots erabiliz. Besteren artean, Urigoitia familiako abokatu Iñigo Iruinek ibilbide judiziala azaltzen du, eta Paco Etxeberria forentseak eta Maider F. Galardi kazetariak kasuaren nondik-norakoak kontatzen dituzte, kasua gertutik ikertu baitute. Gainera, dokumentalak fikzioa ere badu, gertakariak egokiro azaltzeko, besteak beste, Olaia Aguayo eta Xabi Lopez aktoreen partaidetzarekin. HITZAk maiatzean egin zion elkarrizketa zuzendariari, eta sakon azaldu zituen dokumentalaren xehetasunak.
Azaroaren 14an Lezoko Gezala Auditoriumean emango dute, 19:00etan. Oiartzunen azaroaren 27an proiektatuko dute, Landetxe kultur aretoan, 19:30ean. Oiartzuneko proiekziorako sarrerak erosgai daude jada Landetxeko webgunean. Azaroaren 30ean, berriz, Errenterian emango dute, 19:00etan.
