Bollurria. Armairutik ateratzeaz aspertuta daudenentzat.
Emakume batek emakume bat maitatu dezake. Emakume bat emakume bat maitatzen zoriontsua bada, gu ere zoriontsuak gara, maitia. Emakume batek bere goxotasunarekin beste emakume bat ukitzen duenean, dena da super goxoa, super finak dira ohean, elkarri sudur punta ukituz berotzen dira. Ez dute larrutan egiten, jolasten ari dira, goxo nola ez. Emakume hori lodia bada, normala da beste emakume lodi batekin elkartzea. Kresta duen emakumeak emakume femeninoa maiteko du, gainera. Bata mutil rolean eta beste emakumearenean. Eta, gainera, krestaduna behin mutil batekin musukatu zen, eta normalean neskekin oheratzen denez, meritu bikoitza mutilarentzat, agian bere gizon bustoa erakargarriegia dela pentsatuko duelako. Eta emakumeen maitasun sare horretan hirugarren bat sartzen bada, badakizu nolakoak diren neska hauek…
Eta emakume horrek zakila badu? Eta heteroa dirudien emakume horrek ileak baditu titiburuetan? Eta ez bada hain emakume? Eta egunaren arabera bada emakume? Eta munduko lodienak munduko argalena maite badu? Eta goxotasuna alde batera utzita, gogor jarduten bagara eztabaidan? Eta gero sudurra gorputzeko zuloren batean sartzen badizute? Eta edertasuna ilea moztea bada? Eta sexyenak sekulako bizar polita badu? Eta krestadunak gogo txarrez oroitzen badu mutil harekin musukatu zenekoa? Eta harreman batean hirugarren batek sartu nahi badu? Eta ez baduzu bikoterik eduki nahi? Eta lagun batzuek aseko badizkizute gogoa, azala eta zaintza? Eta bikotea, etxea eta umea derrigorrez etorriko ez direla pentsatzen duzunean lasaiago bazaude, zer? Edo nahi eta ezin baduzu?
Kontua ez da norekin oheratzen zaren, zenbat narru-lagun dituzun edota itxuraz heteroa dirudizun edo ez. Hetero-patriarkala da gure mundua; askoren kasuan transfoboa, plumofoboa, bollerofoboa… Lesbiana izatearena beste leku hegemonikoago batean geratu zen, urrun. Bollera izenpean atmosfera eta harremanak beste modu batera uler daitezke, zaintza beste modu batera ere sor daiteke. Posizioak, kodeak eta bizipenak ez lukete absolutuak izan behar gure familietan, gure lagunarteetan, gure herrietan;
eta bolleren artean ere ez, kolektibo bat gara, baina ez gara klonak gure pentsamenduetan.
Bollera eta urria batu dira asteburuotan. Bollurriaren bigarren edizioa ospatuko da bihar, urriaren 23an, Oreretan, 17:00etan emango zaio topaketari hasiera. Aurreko asteburuetan ere Ereñotzun eta Azkainen ospatu da eta, Oreretan egon ezin duenak, oraindik ere izango du aukera Donostian urriaren 30ean. Izena emateko: bollurria@gmail.com
Bihar arte. Badator Bollurria.
