David Iglesias: “Ez gaude ametsetan, igoera zaila da, baina bideragarria”
David Iglesias Albizu (Pasaia, 1975) izango da aurrerantzean Trintxerpeko traineruaren entrenatzailea. Etxeko arraunlaria da, nahiz eta azken urteetan kanpoan aritu den arraunean. Urdaibain, Orion, Zumaian eta Donostiarran arraunean aritu eta gero, etxera bueltan da, estreinakoz entrenatzaile izateko. Etapa berria hastear da zuretzat. Nola bizi duzu momentua? Ilusio handiarekin. Iaz eskaintza berbera egin zidaten, baina orduan ez nuen denborarik, eta ezetz esan nuen. Ordutik ideia buruan bueltaka izan dut, aurten nire lagun eta taldeko presidente ohi Jokin Pegorekin elkartu nintzen arte. Berari nire prestutasuna helarazi nion, berak zuzendaritza berriari komentatu zion, eta ados jarri gara guztiak. Zuzendaritza ere berria da. Zeintzuk dira proiektu berriaren ardatzak? Trainerua hobetzea da erronka, urtero legez. Nik, nire aldetik, lanerako behar dudan guztia topatu dut. Instalazio oso onak, eta orain arte entrenatzaile izandako Manu Perezek utzitako taldea. Berak egin du lan zikina, bost hasiberriri arraun egiten erakutsi dielako. Lana nahiko aurreratua dago, beraz, aurten lortzen dugun guztia aurretik lan ona egin delako izango da. Denboraldia urruti dagoen arren, ziur baduzula lan planteamendurik. Azaroaren 2an hasiko gara entrenatzen. Baliteke bajaren bat izatea, baina talde osoak jarraituko duela espero dut. Horrez gain, nirekin batera Tolosako beste bi arraunlari berri datoz Trintxerpera, Jon Ander Agirre eta Beñat Luluaga, eta [...]
David Iglesias Albizu (Pasaia, 1975) izango da aurrerantzean Trintxerpeko traineruaren entrenatzailea. Etxeko arraunlaria da, nahiz eta azken urteetan kanpoan aritu den arraunean. Urdaibain, Orion, Zumaian eta Donostiarran arraunean aritu eta gero, etxera bueltan da, estreinakoz entrenatzaile izateko.
Etapa berria hastear da zuretzat. Nola bizi duzu momentua?
Ilusio handiarekin. Iaz eskaintza berbera egin zidaten, baina orduan ez nuen denborarik, eta ezetz esan nuen. Ordutik ideia buruan bueltaka izan dut, aurten nire lagun eta taldeko presidente ohi Jokin Pegorekin elkartu nintzen arte. Berari nire prestutasuna helarazi nion, berak zuzendaritza berriari komentatu zion, eta ados jarri gara guztiak.
Zuzendaritza ere berria da. Zeintzuk dira proiektu berriaren ardatzak?
Trainerua hobetzea da erronka, urtero legez. Nik, nire aldetik, lanerako behar dudan guztia topatu dut. Instalazio oso onak, eta orain arte entrenatzaile izandako Manu Perezek utzitako taldea. Berak egin du lan zikina, bost hasiberriri arraun egiten erakutsi dielako. Lana nahiko aurreratua dago, beraz, aurten lortzen dugun guztia aurretik lan ona egin delako izango da.
Denboraldia urruti dagoen arren, ziur baduzula lan planteamendurik.
Azaroaren 2an hasiko gara entrenatzen. Baliteke bajaren bat izatea, baina talde osoak jarraituko duela espero dut. Horrez gain, nirekin batera Tolosako beste bi arraunlari berri datoz Trintxerpera, Jon Ander Agirre eta Beñat Luluaga, eta badira beste pare bat zalantzan daudenak, eta fitxaketa horiek gauzatuz gero, oso kide garrantzitsuak izan daitezke. Helburua argi daukat, KAE 1 Ligara igotzea. Ez gaude ametsetan, igoera zaila da, baina bideragarria. Trintxerpek aurten bosgarren postua lortu du KAE2n, eta taldea manteduz gero, eta etorriko diren arraunlari berriekin batera lanean, helburua igotzea da, zalantzarik gabe. Ez igotzea kolpea litzateke niretzako.
Urte asko egin dituzu arraunean, baina nola gogoratzen dituzu Trintxerpeko hastapenak?
Antonio Pereirak animatuta hasi nintzen arraunean. Lehen urtean ez nuen Trintxerpeko traineruan sartzerik izan, eta Fortunara bidali ninduten. Hurrengo urtean, 1997an, Trintxerpera itzuli nintzen, eta urte ikaragarria izan zen. Pasaiako ahate itsusia izatetik, nabarmentzera pasatu ginen eta oso polita izan zen. 1997. urtean Kontxarako sailkatu ginen lehenbizikoz, eta 1998. urtean Pasaiako Bandera irabazi genuen. Trintxerpeko garai onena izan dela uste dut, eta baita nire garairik oparoena ere.
