Herritarrekin bildu da udala, Udaltzaingoaren gaueko zerbitzua kentzeaz aritzeko
Udala hainbat herritarrekin bildu zen herenegun iluntzean, Udaltzaingoaren gaueko zerbitzua kentzearen erabakiaren gaineko azalpenak emateko asmoz. Bilera horren balantzea egin du alkateak. Ainhoa Zabalok adierazi duenez, orain dela bi aste 350 lezoarren sinadurak aurkeztu zituzten udaletxean, erabakiaren kontra daudela azalduz. Horren harira, udalak bilera egitea erabaki zuen. “Bileraren helburua datu zehatzak ematea zen, eta herrian zeuden zurrumurruak gezurtatzea”, azaldu du Zabalok. Horrela, bere esanetan, herritar batzuek zabaldu dute Udaltzaingoaren gaueko zerbitzua kentzeko prozesua “ezkutuan” eraman dutela, eta hori hala izan ez dela uste du: “Aurrekontuen aurkezpena egin genuenean, azaldu genuen gaueko zerbitzua kenduko genuela”. Bilerarekin, pozik Bileran nahi baino herritar gutxiago azaldu baziren ere, balorazio positiboa egin du alkateak: “Herritarrekin egindako bilera horretan argi eta garbi azaldu genituen prozesu osoan emandako pauso guztiak. Alde horretatik pozik gaude”. Zabalok aitortu duenez, “badakigu gaueko zerbitzua kentzea ez dela denen gustukoa, baina bileran egondakoek argi ulertu zuten gure jarrera, nahiz eta denak ez zeuden ados”. Herritar batek, bilera bukatzean, gaia tratatzeko “arintasuna” eskertu zien. Gaueko zerbitzua kentzeak, baina, eguneko txandan — “06:00etan hasten da eta 22:00etan bukatzen da”— udaltzain gehiago egongo direla ahalbidetzen du. Horri alde positiboa ikusten dio alkateak: “Egunez da jende gehien ibiltzen den momentua, eta, orain, neguan, uneoro bi [...]
Udala hainbat herritarrekin bildu zen herenegun iluntzean, Udaltzaingoaren gaueko zerbitzua kentzearen erabakiaren gaineko azalpenak emateko asmoz. Bilera horren balantzea egin du alkateak.
Ainhoa Zabalok adierazi duenez, orain dela bi aste 350 lezoarren sinadurak aurkeztu zituzten udaletxean, erabakiaren kontra daudela azalduz. Horren harira, udalak bilera egitea erabaki zuen. “Bileraren helburua datu zehatzak ematea zen, eta herrian zeuden zurrumurruak gezurtatzea”, azaldu du Zabalok. Horrela, bere esanetan, herritar batzuek zabaldu dute Udaltzaingoaren gaueko zerbitzua kentzeko prozesua “ezkutuan” eraman dutela, eta hori hala izan ez dela uste du: “Aurrekontuen aurkezpena egin genuenean, azaldu genuen gaueko zerbitzua kenduko genuela”.
Bilerarekin, pozik
Bileran nahi baino herritar gutxiago azaldu baziren ere, balorazio positiboa egin du alkateak: “Herritarrekin egindako bilera horretan argi eta garbi azaldu genituen prozesu osoan emandako pauso guztiak. Alde horretatik pozik gaude”. Zabalok aitortu duenez, “badakigu gaueko zerbitzua kentzea ez dela denen gustukoa, baina bileran egondakoek argi ulertu zuten gure jarrera, nahiz eta denak ez zeuden ados”. Herritar batek, bilera bukatzean, gaia tratatzeko “arintasuna” eskertu zien.
Gaueko zerbitzua kentzeak, baina, eguneko txandan — “06:00etan hasten da eta 22:00etan bukatzen da”— udaltzain gehiago egongo direla ahalbidetzen du. Horri alde positiboa ikusten dio alkateak: “Egunez da jende gehien ibiltzen den momentua, eta, orain, neguan, uneoro bi udaltzain ibiliko dira herrian, astegunetan goizeko zein arratsaldeko txandetan. Herritarrekin harreman handiagoa izango dute, bi izanda”. Asteburutan bi goizez eta bat arratsaldez dabiltza.
Urtarrilean bi intzidentzia
Lezoko alkateak esan duenez, Ertzaintzarekin elkarlanean ari dira, eta herritarrak lasaitu nahi izan ditu alde horretatik. “Urtarrilean, esaterako, bi intzidentzia jaso dira”. Horrela, urte osoan zehar jarraipena egingo dutela adierazi du. Herritarrak lasaitu nahi izan ditu alde horretatik, eta ez kezkatzeko eskatu die.
Gainera, gauetan udaltzainen zerbitzua ez egoteari aukera bat eman behar zaiola eskatu du. Gogorarazi du Lezo “salbuespena” izan dela orain arte: “Gipuzkoan 5.000 eta 10.000 biztanle artean dituzten herrietan, beste bat bakarrik zegoen gauetan txanda egiten zuena”.
