Irungo udal gobernuak PPren babesa izan du 2012ko kontuak onartzeko
Sei orduko eztabaidaren ondoren, 2012ko udal aurrekontuak onartu zituzten herenegun, PSE-EEren eta PPren aldeko bozkekin. Ogasun ordezkari Miguel Angel Paezek aurrekontua “estua, zorrotza eta arduratsua” dela defendatu zuen: “Ez da guk nahiko genukeen aurrekontua, baina benetako errealitate batean oinarrituta dago, eta zuhurtziaz eta arduraz prestatu dugu”. 64.027.399 euroko agiria da onartutakoa, iazkoa baino %7,59 txikiagoa. Alderdi guztiekin elkartu eta gero, gobernu taldea PPrekin eta Bildurekin negoziatzen hasi zen; PPren babesa lortu zuten. PPk “Irunek aurrekontua behar duela” esan zuen plenoan, “aurrekontua ez baitago egungo krisi egoerari hain egokituta. Gainera, aurtengo aurrekontuak ez du zorra handituko, eta tokiko ekonomia pizten lagunduko du”. EAJ eta Ezker Batua, kontra EAJ eta Ezker Batuak kontra bozkatu zuten. Bi alderdiek osoko zuzenketak aurkeztu zituzten, eta jeltzaleek hainbat emendakin partzial ere, gehienak atzera bota zituztenak. EAJko Xabier Iridoyren esanetan, gobernuak osoko bilkurara eramandako aurrekontuak “errakitikoak eta kontinuistak dira, eta paralisiaren sintomak dituzte, udalaren zorraren eraginez”. EAJren emendakin partzial gehienak atzera bota zituzten, eta aurrekontuaren bozketan kontra egin zuten. Ezker Batuak ere osoko zuzenketa aurkeztu zuen, Bilduren aldeko bozka izan zuena. Manuel Millanek adierazi zuen “inbertsiorako aukerarik gabeko aurrekontua” dela, eta ez dituela asetzen «hiritarren benetako beharrak». Hala, kontrako botoa eman zuen Millanek: “Hobetu beharrean, zenbait zuzenketek [...]
Sei orduko eztabaidaren ondoren, 2012ko udal aurrekontuak onartu zituzten herenegun, PSE-EEren eta PPren aldeko bozkekin. Ogasun ordezkari Miguel Angel Paezek aurrekontua “estua, zorrotza eta arduratsua” dela defendatu zuen: “Ez da guk nahiko genukeen aurrekontua, baina benetako errealitate batean oinarrituta dago, eta zuhurtziaz eta arduraz prestatu dugu”. 64.027.399 euroko agiria da onartutakoa, iazkoa baino %7,59 txikiagoa.
Alderdi guztiekin elkartu eta gero, gobernu taldea PPrekin eta Bildurekin negoziatzen hasi zen; PPren babesa lortu zuten. PPk “Irunek aurrekontua behar duela” esan zuen plenoan, “aurrekontua ez baitago egungo krisi egoerari hain egokituta. Gainera, aurtengo aurrekontuak ez du zorra handituko, eta tokiko ekonomia pizten lagunduko du”.
EAJ eta Ezker Batua, kontra
EAJ eta Ezker Batuak kontra bozkatu zuten. Bi alderdiek osoko zuzenketak aurkeztu zituzten, eta jeltzaleek hainbat emendakin partzial ere, gehienak atzera bota zituztenak. EAJko Xabier Iridoyren esanetan, gobernuak osoko bilkurara eramandako aurrekontuak “errakitikoak eta kontinuistak dira, eta paralisiaren sintomak dituzte, udalaren zorraren eraginez”. EAJren emendakin partzial gehienak atzera bota zituzten, eta aurrekontuaren bozketan kontra egin zuten.
Ezker Batuak ere osoko zuzenketa aurkeztu zuen, Bilduren aldeko bozka izan zuena. Manuel Millanek adierazi zuen “inbertsiorako aukerarik gabeko aurrekontua” dela, eta ez dituela asetzen «hiritarren benetako beharrak». Hala, kontrako botoa eman zuen Millanek: “Hobetu beharrean, zenbait zuzenketek aurrekontua okertu dute, beharrezkoak ez diren asmoetarako direlako”.
PPk hamasei zuzenketa partzial aurkeztu zituen, zortzi aurrekontua handitzeko eta beste hainbeste gutxitzeko. Horietako batzuk udal gobernuarekin adostuta zeuden, hala nola, hiriari buruzko liburu bat argitaratzeko partida kentzea, eta Kale Nagusiaren zaharberritzeko lanak egitea (25.000 euro). Beste zuzenketa batzuk herenegun bertan erretiratu zituzten, eta gainontzekoak plenoan eztabaidatu eta onartu zituzten, horien artean Irun 2020 Estrategia Bulegoa kentzea (Bidasoa Bizirik-en esku geratuko da, udal teknikari baten bitartez).
Ondoren jeltzaleek aurkeztu zituzten euren emendakinak. Bi izan ziren aurrekontua gehitzeko EAJk aurkeztu eta osoko bilkuran onartutako proposamenak: Hiri Debekatuaren Mapan zehaztutako emakumeentzako puntu ilunetan lanak egiten hasteko partida bat, eta autobus geltokietan informazioa hobetzeko beste bat, “erabiltzaile berriak lortzeko modu bat” izango delako.
Belaskoenea eta Artia
Jeltzaleen emendakin nagusiak Belaskoenean eta Artian hainbat hirigintza lan egiteko proposamenak ziren, bi auzoetako aparkaleku arazoak arintzeko asmoz. PSE-EE eta Bildu kontra agertu ziren, eta azkenean, udal gobernuak proposatuta, 50.000na euroko bi partida onartu zituzten: Belaskoenean jeltzaleek aipatutako eremuan aparkaleku zein aisia guneak uztartzeko proiektu baten ikerketa egiteko, eta Artiako Pio Baroja kale inguruko hirigintza berraztertzeko.
Bilduk ez zuen emendakin partzialik aurkeztu, eta bozketan abstenitu egin zen. Koalizioarentzako finantza egoerak hiriko funtzionamendua bermatzen du, baina finantzaketa modu ezberdinak bilatzeko ordua dela uste dute: “Aldunditik datozen diru sarrerek udal kontuak erabat baldintzatzen dituzte, eta murrizketa hain izan da handia, ez duela mugitzeko aukerarik ematen”.
