Gerturatu nahi duenarentzat, zabalik
Altzibarko Gaztelekua 17. urteurrenera heldu da. Bertako kideek etzi ospatuko dute data berezia, egun guztiko jaiarekin. Bizilagunei zein herritarrei agertzeko deia egin diete, bai etzi, eta baita aurrerantzean ere. Hamazazpi urte daramatza Altzibarko Gaztelekuak zabalik. Hasieran, gazte batzuek hartu zuten lokala, eta hainbat ekintza egiten hasi ziren, hasieran auzokoentzat, eta gero herritarrentzat zein kanpotarrentzat. Pixkanaka. Urte hauetan guztietan hasierako filosofiarekin jarraitu eta hainbat ekitaldi antolatu dituzte: Altzibarko jaietan txosna urtero; kontzertuak Gaztelekuan bertan eta kanpoaldean; truk txapelketak; reggae festak; gitarra eskolak… Orain ere musika sortzeko Nuendo programa nola erabili ikasten ari dira. Horrez gain, lokalaren kanpoaldea zaintzen ere ahalegindu dira: eserlekuak egin, mahaiak ere bai, saskibaloi kantxa zaindu, fatxada konpondu eta pintatu… Egindako lanak, baina, herrian isla gutxi izan duela uste dute, eta urte hauetan udalean egon diren gobernu taldeek ere pixka bat alboratuta izan dituztela. Txarly Outeiralek azaldu du zergatik: «Esan izan digute gauzak egin behar ditugula, eta batzuk egiten ditugu, baina laguntzarik ez dugu jaso, eta gutaz ahaztu direla iruditu zaigu». Zigor Arakamak, Gaztelekuko gainontzeko kideek bezala, bat egin du Outeiralen iritziarekin: «Uste dugu udala ez dela gurekin nahikoa konprometitu». Autokritika ere egin dute. Gauza gehiago egiteko potentziala badutela badakite, baina iniziatiba eta inplikazio falta izan dituztela. Hori [...]
Altzibarko Gaztelekua 17. urteurrenera heldu da. Bertako kideek etzi ospatuko dute data berezia, egun guztiko jaiarekin. Bizilagunei zein herritarrei agertzeko deia egin diete, bai etzi, eta baita aurrerantzean ere.
Gorka Cabrera, Txarly Outeiral, Juanan Tarragona, Aitor Vega, Itsaso Telletxea, Garazi Pires eta Zigor Arakama.
Hamazazpi urte daramatza Altzibarko Gaztelekuak zabalik. Hasieran, gazte batzuek hartu zuten lokala, eta hainbat ekintza egiten hasi ziren, hasieran auzokoentzat, eta gero herritarrentzat zein kanpotarrentzat. Pixkanaka.
Urte hauetan guztietan hasierako filosofiarekin jarraitu eta hainbat ekitaldi antolatu dituzte: Altzibarko jaietan txosna urtero; kontzertuak Gaztelekuan bertan eta kanpoaldean; truk txapelketak; reggae festak; gitarra eskolak… Orain ere musika sortzeko Nuendo programa nola erabili ikasten ari dira. Horrez gain, lokalaren kanpoaldea zaintzen ere ahalegindu dira: eserlekuak egin, mahaiak ere bai, saskibaloi kantxa zaindu, fatxada konpondu eta pintatu…
Egindako lanak, baina, herrian isla gutxi izan duela uste dute, eta urte hauetan udalean egon diren gobernu taldeek ere pixka bat alboratuta izan dituztela. Txarly Outeiralek azaldu du zergatik: «Esan izan digute gauzak egin behar ditugula, eta batzuk egiten ditugu, baina laguntzarik ez dugu jaso, eta gutaz ahaztu direla iruditu zaigu». Zigor Arakamak, Gaztelekuko gainontzeko kideek bezala, bat egin du Outeiralen iritziarekin: «Uste dugu udala ez dela gurekin nahikoa konprometitu».
Autokritika ere egin dute. Gauza gehiago egiteko potentziala badutela badakite, baina iniziatiba eta inplikazio falta izan dituztela. Hori aldatzeko, taldetxo bat sortu dute, batzorde antzeko bat. Iazko irailean hasi ziren lanean, eta dagoeneko ideia batzuk biribiltzen ari dira.
Izan ere, Gazteleku proiektu komun polita dela uste dute: «Tokia ondo dago, adin guztietako jendea elkartzen da, gauzak egiten ditugu elkarrekin, lasai egoteko aukera ere badugu…».
Gainera, gogorarazi dute denentzat dagoela irekita, eta etziko urteurren jaian parte hartzera animatu dituzte: «Giro ona izango da eta lagunarte atsegina».
Etzitik aurrera ere, denentzat irekita jarraituko du Gaztelekuak: «Gauzak egiten jarraituko dugu, ikastaroak edo dena delakoak».
Beraz, orain arteko arantzak arantza, lanean jarraitzeko asmoa dute, herritarrentzat ateak zabalik mantentzen jarraitzeko borondatea, eta udalarekin elkarlana sortzekoa.
Etziko egitaraua
- 10:00etan. Txupinazoa.
- 10:30ean. Toka Txapelketa. Parte hartzea: euro bat. Lehen saria: txuleta bat eta ardo botila bat. Bigarren saria: baserriko oilaskoa.
- 12:00etan. Trikipoteoa, auzoan barrena.
- 14:00etan. Bazkaria. Parrillada (bost eurogatik).
- Gero. Karaokea.
- Ondoren. Musika.
