Gutuna: ‘Hausnarketa tasa igoeren aurrean’
Duela hilabete bat jakin ahal izan genuen Pasaia zela Gipuzkoako herri guztien artean per capita errenta txikiena duena, alegia, Gipuzkoako herririk pobreena. Hori horrela izanik harridura eta haserrea sorrarazi zizkidan jakiteak azken udalbatzarrean udal tasak % 8 eta 15 artean igotzea onartu zutela. Are haserretuago kontutan izanda gure eskualdeko beste udaletan ezarri dituzten igoerak zenbatekoak izan diren jakinda: Errenterian %3, eta Oiartzunen zergak %2,4 eta tasak %3,4. Alde nabarmena, alajaina! Bat-batean gogora etorri zitzaidan Europak erreskatatu berri dituen Greziako eta Portugaleko gobernuek krisialdiari aurre egiteko hartutako doitasun neurriak, izan ere, gure udalaren antzera bi herrialde hauek neurriz kanpoko zerga igoerak ezarri dizkiete euren herritarrei. Agerian utzi digu honek ezkerreko alderdi bat agintera iristen denean eskumako alderdien politika berbera hartzen duela ekonomia arloan. Nago, krisialdi latz honen testuinguruan berdin egingo zukeela Margaret Thatcherek agintean jarraitu izan balu: lehenik eta behin zergak eta tasak modu basatian igoko zituzkeen, horren jarraian ekingo ziokeen bestelako murrizketei. Hori da, laburtuta, neoliberalen formula krisialdiari aurre egiteko. Ez nuen uste Bildukoek, ezkerreko alderdia izanik, eta bere burua langile eta jende apalaren ordezkaritzat duenak horrela jokatuko zuenik, ez dakit ez ote zaien idortu beren sentiberatasuna krisia gehien astintzen duen herritarrekiko? Gero sinestaraziko digute behartuta egon omen direla neurri [...]
Duela hilabete bat jakin ahal izan genuen Pasaia zela Gipuzkoako herri guztien artean per capita errenta txikiena duena, alegia, Gipuzkoako herririk pobreena. Hori horrela izanik harridura eta haserrea sorrarazi zizkidan jakiteak azken udalbatzarrean udal tasak % 8 eta 15 artean igotzea onartu zutela. Are haserretuago kontutan izanda gure eskualdeko beste udaletan ezarri dituzten igoerak zenbatekoak izan diren jakinda: Errenterian %3, eta Oiartzunen zergak %2,4 eta tasak %3,4. Alde nabarmena, alajaina!
Bat-batean gogora etorri zitzaidan Europak erreskatatu berri dituen Greziako eta Portugaleko gobernuek krisialdiari aurre egiteko hartutako doitasun neurriak, izan ere, gure udalaren antzera bi herrialde hauek neurriz kanpoko zerga igoerak ezarri dizkiete euren herritarrei. Agerian utzi digu honek ezkerreko alderdi bat agintera iristen denean eskumako alderdien politika berbera hartzen duela ekonomia arloan. Nago, krisialdi latz honen testuinguruan berdin egingo zukeela Margaret Thatcherek agintean jarraitu izan balu: lehenik eta behin zergak eta tasak modu basatian igoko zituzkeen, horren jarraian ekingo ziokeen bestelako murrizketei. Hori da, laburtuta, neoliberalen formula krisialdiari aurre egiteko. Ez nuen uste Bildukoek, ezkerreko alderdia izanik, eta bere burua langile eta jende apalaren ordezkaritzat duenak horrela jokatuko zuenik, ez dakit ez ote zaien idortu beren sentiberatasuna krisia gehien astintzen duen herritarrekiko? Gero sinestaraziko digute behartuta egon omen direla neurri zorrotz hauek hartzera. Zer axola herritarren poltsikoak lehendik ere zulatuta bagenituen!
Baina nire haserrea ez doa soilik neurri antisozial hauek proposatu dituen alderdi honen kontra, oposizioan dauden beste alderdiei ere zabaldu nahi nieke: alde batetik, PSEren kontra, euren arduragabekeriaz baliatu zelako Bildu udal tasen igoera gauzatzeko; eta bestetik EAJ eta EBko Xabier Pombo zinegotziaren kontra ere. Itxurakeriaren adibide ezin argiagoa eskeini digute bi alderdiok, izan ere, kezkatuta eta haserre aurpegia jarri dute komunikabideen aurrean igoeraren bidegabekeria salatzeko, baina bertan egon zen lagun batek adierazi zidan bezala ez ziruditen, ordea, hain hunkituta Udalbatzaren ostean, udal idazkariaren txantxekin barrez aritu zirenean. Jakina, bere botuemaileek ez dute barre algara horien berri izango. Urruti geratzen zaizkie herritarren estutasunak hilabete bukaerara iristeko.
Eta, azkenik, galdetuko nieke gure sindikatuei ez ote duten ezer egin behar herritar eta langileon kontrako neurri hauen kontra? Ala otzan-otzan jarraituko dute, udal gobernu taldeak hartutako neurri guztiei men eginez?
Hodei Colina. San Pedro.
