Bigarren postua bilatuko du bihar Hondarribiak Hondartzan
Ohorezko Mailako bederatzigarren jardunaldia jokatuko da asteburu honetan. Goiz da oraindik ezer gutxi argitzeko, baina emaitzaren batek talde bakoitzaren helburuak zeintzuk izango diren zehazten hasteko balio dezake. Hondarribiak bihar jokatuko du, 15...
Ohorezko Mailako bederatzigarren jardunaldia jokatuko da asteburu honetan. Goiz da oraindik ezer gutxi argitzeko, baina emaitzaren batek talde bakoitzaren helburuak zeintzuk izango diren zehazten hasteko balio dezake. Hondarribiak bihar jokatuko du, 15:30etik aurrera, Ondarroako Aurreraren kontra.
Hondarribia taldeak gutxi izango du bihar jokoan, eta aldi berean asko. Izan ere, denboraldia hasi aurretik ia zale guztiek sinatuko lukete zortzi partida eta gero hirugarren postuan egotea, eta egia da bihar Hondartzan galduz gero taldearen kokapena sailkapenean ona izaten jarraituko duela.
Baina, gauzak dauden bezala egonda, bihar Hondartzan jokatuko duten partida irabaztea ezinbestekoa da, bi arrazoiengatik: Batetik, liga amaieran berdeak non egongo diren ez dakigulako, eta, gauzak okertuz gero, Aurrera taldea zuzeneko aurkaria izan daitekeelako.
Eta, bestetik, Mikel Llorentek zuzentzen duen taldeari goiko postuetan lehiatzea egokitzen bazaio, Ondarroako taldearen aurka hiru puntuak lortzea garrantzitsua litzateke, denboraldiaren bukaeran goiko aldean egongo direnek puntu gutxi galduko dituztelako etxean multzoko talde apalen kontra.
Hautagai asko bigarren izateko
Hamabost punturekin, sailkapeneko hirugarren postuan dago Hondarribia, Real Union eta Oiartzunekin berdinduta, eta bigarren den Touringetik puntu bakarrera. Errenteriarrek partida zaila dute, Bergaran; hortaz, irabaziz gero, bigarren postua lor dezake Hondarribiak.
Biharko aurkaria, Aurrera, azken hirugarren da, 6 punturekin; partida bakarra irabazi eta hiru berdindu dituzte bizkaitarrek.
