Santa Zezilian, kalejira, kontzertua eta Kantu Kantari
Gaurko, kaleko emanaldia antolatu du Ibargainek; kontzertua egingo dute Lartaungo musikariek igandean Bihar da Zezilia Deuna edo Santa Zezilia, musikaren eta musikarien eguna, azaroaren 22a. Horren harira, hainbat ekitaldi antolatu dituzte Ibargain Musika Eskolak eta Lartaun Abesbatzak. Eskolak, musikarien zaindariaren omenez emanaldi berezia antolatu du gaurko. 17:45ak aldera, musika eskolako ikasle eta irakasleak eskolako atarian bildu eta kalejiran —Ikusi mendizaleak kantari eta soinu tresnak joaz—, Aialde kaletik Doneztebe plazara igoko dira. Plazara iritsitakoan udaletxearen aurrean «abesti ezagunez osatutako kantaldia» emango dute. Honako abestiak kantatuko dituzte: Maritxu, Maritxu; Udaberrian, Arrano Beltza eta Baketue Tuepapa. Ibargaingo arduradunek zehaztu dutenez, kantaldia irekia izango da: «Hurbiltzen diren guztiak, haurrekin eta gazteekin batera abestera gonbidatuta daude». Saioa bukatuta, plazatik Ibargain Musika Eskolara kalejiran joango dira berriro, Ikusi Mendizaleak abestiarekin. Eguna kantari bukatuko dute. Lau helburu ditu saio horrek, Ibargaingo zuzendari Juan Pablo Lizartzak jakinarazi duenez: «Hurrengo eguna musikarien eguna dela iragartzea; musika eskola kalera ateratzea, batez ere, ikasle gazteenak; publikoa gurekin batera kantan eta dantzan jartzea, eta, azkena, baina ez garrantzi gutxiagokoa, ondo pasatzea». Hala, herritar guztiak animatu dituzte musika eskolako ordezkariek gaurko ekimenean parte hartzera. Kantu Kantari eta kontzertua Lartaun Abesbatzak, bi ekitaldi antolatu ditu, biak asteburuari begira. Etzidamu, Kantu Kantari ekimena egingo dute. [...]
Gaurko, kaleko emanaldia antolatu du Ibargainek; kontzertua egingo dute Lartaungo musikariek igandean
Bihar da Zezilia Deuna edo Santa Zezilia, musikaren eta musikarien eguna, azaroaren 22a. Horren harira, hainbat ekitaldi antolatu dituzte Ibargain Musika Eskolak eta Lartaun Abesbatzak.
Eskolak, musikarien zaindariaren omenez emanaldi berezia antolatu du gaurko. 17:45ak aldera, musika eskolako ikasle eta irakasleak eskolako atarian bildu eta kalejiran —Ikusi mendizaleak kantari eta soinu tresnak joaz—, Aialde kaletik Doneztebe plazara igoko dira.
Plazara iritsitakoan udaletxearen aurrean «abesti ezagunez osatutako kantaldia» emango dute. Honako abestiak kantatuko dituzte: Maritxu, Maritxu; Udaberrian, Arrano Beltza eta Baketue Tuepapa.
Ibargaingo arduradunek zehaztu dutenez, kantaldia irekia izango da: «Hurbiltzen diren guztiak, haurrekin eta gazteekin batera abestera gonbidatuta daude».
Saioa bukatuta, plazatik Ibargain Musika Eskolara kalejiran joango dira berriro, Ikusi Mendizaleak abestiarekin. Eguna kantari bukatuko dute.
Lau helburu ditu saio horrek, Ibargaingo zuzendari Juan Pablo Lizartzak jakinarazi duenez: «Hurrengo eguna musikarien eguna dela iragartzea; musika eskola kalera ateratzea, batez ere, ikasle gazteenak; publikoa gurekin batera kantan eta dantzan jartzea, eta, azkena, baina ez garrantzi gutxiagokoa, ondo pasatzea».
Hala, herritar guztiak animatu dituzte musika eskolako ordezkariek gaurko ekimenean parte hartzera.
Kantu Kantari eta kontzertua Lartaun Abesbatzak, bi ekitaldi antolatu ditu, biak asteburuari begira. Etzidamu, Kantu Kantari ekimena egingo dute. 12:30ean aterako dira Landetxeko plazatik, eta Elizalden zehar kantari ariko dira. Herritar guztientzat irekitako ekimena da.
Igandean, berriz, Lartaun Txistulari Taldearekin batera kontzertua emango dute abesbatzako kideek, 12:30etik aurrera, Kontzejupean. Ekimenaren Antolatzaileek animatzeko deia egin diete herritarrei: «Anima zaitezte ekitaldi hauetan parte hartzera».
