Etzi hasiko da kanpaina. Ezkerreko koalizio subiranistak Iruna joateko deia egin du, eta presentzia edukiko dute kalean zein etxeetako buzoietan.
Pasa den astean kanpainako egitaraua prestatzeko batzarra egin zuen Oiartzungo EH Bilduk.
Ostegunean hasiko da —berriro— Madrilgo Gorteetarako hauteskunde kanpaina. Oiartzungo EH Bilduk egitaraua prestatu du kanpaina aurrera eramateko. Lehenengo deialdia ez da herrian propio izango. EH Bilduk irekiera ekitaldia Irunen egingo du, eta hara joateko deia luzatu dute. 20:00etan hasiko da ekitaldia, San Juan Arria plazan, eta hizlari moduan kongresurako bi zerrendaburu izango dira: Marian Beitialarrangoitia, Gipuzkoakoa, eta Oskar Matute, Bizkaikoa. Arnaldo Otegi lehendakarigaia ere bertan izango da.
Oiartzuni dagokionez, aurreko asteko bileran prestatu zuten plangintza. 40 lagun inguru bildu ziren bertan, eta honako egitaraua prestatu zuten:
- Hilak 12: 1979az geroztik herriko hautetsi independentistak izandakoei aitortza ekitaldia. 13:00etan izango da, Pleno Aretoan. Bertan Marian Beitialarragoitia, Gipuzkoako zerrendaburuak parte hartuko du.
- Hilak 15 eta 16: Etxez etxe banatuko dituzten botoak gutunazaletan sartuko dituzte Done Eztebe plazan, jai giroan, 16:00etatik aurrera.
- Hilak 16: Pintxo potea plazan, 20:00etatik aurrera.
- Hilak 21 eta 22: Botoak etxez etxe banatuko dituzte.
Horrez gain, gogorarazi dute posta bidezko botoa emateko aukera egongo dela. Modu horretan botoa eman nahi dutenek, Alkartetxetik pasa daitezke egunero, hilaren 14ra arte, 18:00etatik 20:00etara. Bertan emango dizkiete argibideak.
