Duela lau urte urte bezain beste boto jaso dira dagoeneko
Ia auzo guztietan 2015ean bezain beste boto jaso dira, hauteslekuak ixteko ordubete pasatxo falta denean. Parte hartzeak gora egin du bi puntuan, goizeko joera mantenduz.
Elizalden jarritako mahaietako bat. Ez telefilmek, ez Italiako Giroak, ezta Sagardo Egunaren ajeak ez dute oiartzuarren parte hartzean eragin handirik izan. 18:00etako datu ofizialen arabera, botoa emateko eskubidea duten 8.082 oiartzuarretatik 4.318 hurbildu dira hauteslekuetara —erroldaren %53,43—.
Hiru ordu laurden beranduago, 18:45ean, ia auzo guztietan duela lau urteko kopuru bera jaso dute. Beraz, 20:00ak arte sartuko diren papertxoak parte hartze zifra igoko dute. Hauteslekuak ixtean, Europako Parlamenturako bozak kontatuko dituzte lehendabizi, eta ondoren gutun-azal zurien barrukoak, eta sepia kolorekoak ondoren.
