[Bideoa] 120 frontal piztu dira, mendi tontorrean
Aiako Harrian egindako ekintza ikusgarriaren bideoa zabaldu du Gure Eskuk. Xehetasunetan sakondu gabe, hamarnaka lagunek egindakoa islatzen dute.
Romeo Campok Altzibartik ateratako argazkia biral egin da. Klisk bakarrean jaso zuen irudia, baina hainbat minutu iraun zuen ekintzaren atzean lan handia dago.
Gure Eskuk atzokoaren making of-a zabaldu du, bideo batean. Xehetasunetan gehiegi sakondu gabe, ekintzaren pintzelkadak agertzen dira bideo horretan.
120 lagun
Jexux Olaziregik Euskadi Irratiko Faktoria saioan eman ditu azalpen gehiago. Gure Eskuko kideak azaldu duenez, orain dela bi aste hasi ziren ekintza prestatzen, Auzitegi Gorenaren epaia hurbiltzen ari zen bitartean. Azaldu duenez, asteleheneko mobilizazioei eta larunbateko manifestazioari ekintza ikusgarri bat gehitu behar zioten.
Inspirazioa Montserraten egin zuten Llum i llibertat (Argia eta askatasuna, katalanez) ekitaldian izan zuen inspirazioa. Argi dugu bidea izenarekin ari dira ekintzaren irudiak. Hasieran batean suziekin egin nahi zuten, baina haizeak jotzen zuenez, frontalak-eta erabili zituzten.
120 bat lagun bildu ziren Aiako Harriaren gailurrean, Euskal Herri osotik etorritakoak. Lehendabizi eskalatzaileekin aurrez aurre hitzartu zituzten atzoko ekintzaren nondik norakoak, eta astelehenean hasi ziren deialdi zabala egiten, sare sozialen bitartez.
Eta atzo arratsean piztu zituzten argiak. Kataluniarako norabideaz gain, izpiek beste toki batera apuntatzen zuten: Donostian larunbatean egingo den manifestaziora.
Bestalde, euskal gehiengo sindikalak deituta, geldialdiak egingo dituzte bihar. Oiartzunen kasuan, elkarretaratzea egingo dute Done Eztebe plazan, 11:00etan.
