Bilbo eta Baionako manifestazioetara joateko deia egin du Sarek
Igandean egindako herri lasterketan modu batera edo bestera parte hartu zutenei eskerrak eman dizkiete. Autobusentzako zerrendak zabalik daude.
Igandean atera zuten argazkia, Joanes Larretxearen etxeratzea eskatzeko. Joanes Etxera herri lasterketa egin zuten pasa den igandean, Oiartzunen, Sarek antolatuta. 600 dik gora herritarrek parte hartu zuten modu batera edo bestera: korrikalari helduak zein haurrak, hizlariak, segurtasun boluntarioak, antolakuntzako kideak, merkatariak, luntx prestatzaileak, animatzaileak…
Horiei guztiei eskerrak eman dizkiete Sare herritarreko kideek. Eta dei bat egin dute: “600dik gora herritarrok egin genuen Joanes etxeratze bidean jarri eta salbuespen legediarekin bukatzeko aldarria. Orain urtarrilaren 11n dugun manifestazioari begira jartzeko garaia da, konponbidearen bidean premiazkoak diren korapiloak askatzea ezinbestekoa da”.
Presoak etxeratzeko bidean, hainbat urrats eman behar direla iritzi dute: urrunketarekin bukatu, 105 motxiladun umeren sufrikarioa amaitzea, lehen gradua atzean utzi. “Azken finean”, zehaztu dute, “salbuespen legedia honekin amaitzea premiazkoa da”.
Horretarako, hilaren 11n Bilbon zein Baionan Orain presoak. Atera bidera lelopean egingo diren manifestazioetan parte hartzera deitu dute.
Autobusak
Manifestazioetara joateko autobusak antolatu dituzte. Bilbora joan nahi dutenek, txartelak erosi beharko dira Kastron edo txokolategian, hamar euroren truke. Ikastolako aparkalekutik aterako da autobusa, 15:00etan.
Baionara joan nahi dutenek, berriz, izena eta abizena zein telefono zenbakia eman beharko ditu Kastro tabernan. Autobusa aterako da baldin eta beteko bada, eta telefonoz jakinaraziko diete izena eman dutenei. Betetzekotan, 13:00etan aterako da ikastolako aparkalekutik.
