Hodei Ezpeletak jantzi du aizkolari gazteen lehen Xanisteban Sariko txapela
Hogei urtez azpiko bost aizkolariren arteko lehia ikusteko aukera egon da Madalensoron. Iker Vicentek eta Irati Astondoak desafioak egin dute.
Giro polita egin zuen igande eguerdian. Egokia, adibidez, aizkolarien arteko desafio bat ikusteko. Oiartzungo Herrikirolzaleek aizkolari gazteen I. Xanisteban Txapelketa antolatu zuten. Bost aizkolari hurbildu ziren Madalensoroko plazara, eta lau kanaerdiko eta 54 ontzako bi enbor moztu behar izan zituzten. Gipuzkoako Herri Kirol Federazioko epaileen begiradapean egin zuten lana.
Hodei Ezpeleta eibartarra izan zen denbora gutxien behar izan zuena, hamahiru minutu pasatxo. Ez zuen urrun izan Unai Zabala leaburuarra. Horrela gelditu zen lehenengo txapelketaren sailkapena:
- Hodei Ezpeleta: 13:02.
- Unai Zabala: 13:43.
- Xuban Kañamares: 14:55.
- Axel Larrañaga: 20:37.
- Markel Zapirain: 22:08.
Ondoren, desafioa
Lehiaren ondoren, desafioaren txanda izan zen, Euskal Herriko bi aizkolari onenetakoen artean: Iker Vicente eta Irati Astondoa. Astondoak 82 ontzako enborra moztu behar zuen eta Vicentek kana bat eta bi ontzakoa, baina zutik.
Ikuskizun polita eman zuten; Vicentek 29 minutu eta 46 segundotan moztu zuen enborra eta Astondoak 32 minutu eta 12 segundotan. Eta igandean Madalensorora hurbiltzeko aukerarik izan ez zuenak urtarrilaren 18an ikus dezake, ETB1en emango baitute.
-
- Vicente, enbortzarraren aurrean.
-
- Astondoa lan erdiak eginda.
-
- Ezpeleta, lana bukatzen.
