Larunbatean eros daitezke Pirritx, Porrotx eta Marimotots ikusteko sarrerak
Ugaldetxo Kultur Taldeak antolatzen duen ekitaldia hilaren 26an izango da, Elorsoron. Toki berean salduko dituzte txartelak.
Ugaldetxo Kultur Taldeak urtero antolatzen du Pirritx, Porrotx eta Marimototsen ikuskizuna. Hilaren 26an izango da, eta pailazoak Bizi dantza ikuskizunarekin hurbilduko dira Elorsoro kiroldegira. 17:00etan hasiko da ikuskizuna.
Aurten ere, iaz bezala, sarrera guztiak Elorsoro kiroldegiko leihatilan erosi beharko dira. Datorren larunbata —hilak 18— izango da horretarako aukera. Takila 17:00etatik 19:00etara egongo da irekita.
Sarrera bakoitzak zortzi euroko prezioa izango du, eta pertsona bakoitzak, gehienez, zortzi sarrera erosteko aukera izango du.
Ugaldetxo Kultur Taldeak eskaera bat egin die gurasoei. Azken urteetan arrakasta handia izaten ari da Pirritx, Porrotx eta Marimotosen emanaldia. Horregatik, gurasoei eskatu diete haurrentzako sarrerak lehenesteko. Bi guraso joan ordez, bakarra joan dadila eskatu dute, haurrentzako ahalik eta toki gehien egon dadin.
