[Bideoa] Xingoladun ikurrina eta loreak Saldise oroitzeko
40 urte bete dira gaur Karlos Saldise hil zutela. Talde ultraeskuindar parapolizialek hil zuten etxe atarian, arratsean, gaurko egunez, 1980an. Ez da ikerketarik, ezta aitortza ofizialik izan, baina 40 urte hauetan hutsik egin gabe oroitu dute Saldise bere herrikideek.
Karlos Saldiseren omenez ikurrina eta lore sorta. 40 urte bete dira gaur Karlos Saldise hil zutela. Talde ultraeskuindar parapolizialek hil zuten etxe atarian, arratsean, gaurko egunez, 1980an. Ez da ikerketarik, ezta aitortza ofizialik izan, baina 40 urte hauetan hutsik egin gabe oroitu dute Saldise bere herrikideek. Gaur, 40 urte geroago, hala egin dute. Goizean goiz xingoladun ikurrina eta lore sorta ziren bere etxea zenaren atarian, duela 40 urte zerraldo utzi zuten leku berean.
Atzo gauean ere egin zuten hura oroitzeko ekimena. Kiroldegia Altamirarekin lotzen duen igogailuaren pasarelan Karlos Saldiseren irudia duen pankarta handia zabaldu zuten bengalen argiekin lagunduta hainbat lagunek.
Urteurrenaren harira antolatu duten egitarauaren barruko hitzorduetako bat baino ez da izan hori, egitarau zabala prestatu baitu Karlos Saldise: maitasun bulkadez askatasunera herri batzordeak lezoarraren ibilbidea eta konpromisoa aitortu eta oroitzeko.
Bihar eta etzi artean egingo dituzte ekitaldi nagusiak, hiru guztira, Saldise zena oroitzeko. Kultur ikuskizuna antolatu dute bihar; 19:30ean izango da Gezala auditorioan. Karlos Saldise: Herriari loturiko bizitza betea goiburuarekin, Karlosen bizitzari buruzko ikus-entzunezkoa osatu dute, eta olerkiekin, dantzarekin eta abestiekin atondu. Ikuskizunaren ostean, otordutxoa ere antolatu dute herri batzordeko kideek. Ikuskizunaren bidez Saldiseren bizitza, entzuten zuen musika, bere konpromisoa borroka soziala eta politikoarekin jarriko dute agerian.
Etzi berriz, omenaldi ekitaldia eta herri bazkaria egingo dituzte, eta horiekin amaituko dute Saldiseren omenezko egitaraua. 12:30ean egingo dute ekitaldi nagusia Saldiseren omenezko oroitarriaren aurrean eta agurra dantzatu, lore eskaintza egin eta hitzartzeekin osatuko dute. Herri bazkariaren txanda helduko da gero; Lezoko ikastolaren jangelan izango da eta bazkarirako txartelak Tiñelu elkartean eskura daitezke, helduenak 25 euroan eta haurrenak, 7 euroan.
Hilketatik 40 urte bete direnean, Saldise oroitu nahi dute, haren bizitza, haren bidea eta haren konpromisoa eta horretara deitu dituzte lezoarrak: «Karlos laguna zen, militante bat, herrikidea, langile bat eta desagerrarazi egin zuten, hil egin zuten; ikustea berriz ere berpiztu dela gertatu zenaren injustizia hori ederra da, bere oroimena, bere bizitza berreskuratzea delako».
Ondoko bideoa Piztu Lezo iniziatibarena da.
