Zaporeak-ek crowfundinga egingo du, furgoneta erosteko
Ostiral eta larunbatean iraungitze data luzea duten elikagaiak jasoko dituzte Alcampon. Gainera, dirua bildu nahi dute, furgoneta bat erosteko.
Bildutako janaria Lesbosen banatzen dute. Zaporeak egitasmoak janari bilketa egingo du bihar eta etzi Oiartzungo Alcampo dendan. Iraungitze data luzea duten jakiak bilduko dituzte, honakoak: makarroiak, dilistak, babarrunak, garbantzuak, sardina eta atun latak, oliba olioa, espezieak (kuminoa, kurkuma, curry-a, piperrauts txuri eta beltza), ilarrak kontserban…
Egitasmoko kideek jakinarazi dutenez, funtsezkoa da Euskal Herrian egiten den lana. “Janari bilketak bezalako ekintza xume horrek pertsona hauei duintasuna helarazten die. Izan ere, pertsona hauen oinarrizko eskubideak zapalduta daude, batere bermerik gabe bizi dira, eta otordu osasuntsu eta freskoak on besterik ez die egiten”, esan dute.
Alcampok irekita irauten duen bitartean jasoko dituzte elikagaiak. 09:00etatik 22:00etara egongo dira bertan. Gaur egun, 1.500 errefuxiaturi ematen diete jaten.
Crowfunding-a, furgonetarako
Otordu horiek banatzeko, baina, furgoneta bat erabiltzen dute. Furgoneta berri bat erosi nahi dute, eta 40.000 euro jaso nahi dituzte horretarako. Zaporeak-ek epea jarri diote beren buruari: martxora arte bildu nahi dute sos kopuru hori.
“Horretarako”, zehaztu dute, “bidelagun izango dugu Gipuzkoa Solidarioa Kutxa fundazioa. Urtarrilaren 7tik martxora amaierarte beraien larrialdietarako kontua proiektu honetarako bideratu baitute. Ondorioz, kontu horretara ekarpena egiten duen orok hobari fiskalak izango ditu errenta kanpaina iristen den garaian, Zaporeaken proiektuari ekarpena egiteaz gain”.
Honakoa da Kutxabanken ireki duten kontua, nahi duenak ekarpena egin dezan: 2095 5381 10 1064092199.
