Indarkeria matxistaren diagnosia, indarkeria mota horri kontra egiteko bide orria
Atzo arratsaldean aurkeztu zuten indarkeria matxistaren diagnosia. Oiartzunek dituen lehentasunei ekiteko erabiliko dute.
Herritar ugari bildu zen pleno aretoan. Herritar dezente hurbildu ziren atzo arratsaldean udaletxeko pleno aretora. Oiartzungo indarkeria matxistaren egoeraren diagnosia aurkeztu zuten. Sortzen Aholkularitzak osatu du diagnosi hori.
Maitane Iribar Feminismo Saileko teknikariaren hitzetan, 2016 eta 2019eko maiatza arteko datuak jaso dituzte. Gainera, indarkeria jaso duten emakumeei arreta ematen dieten eragile eta erakundeekin elkarrizketak egin zituzten ekainean eta uztailean. Ertzaintza, Udaltzaingoa, udaleko gizarte zerbitzuetako langileak edota ikastetxeetako profesionalak dira eragile horiek.
Iribarrek nabarmendu zuenez, gaia oso delikatua eta oso konplexua da, eta argazki finko bat egitea oso zaila da. Gabeziak identifikatu eta dauden erronkei aurre egiteko bide orri bezala erabiliko dute diagnosia.
Datuen erkaketa
Datu zehatzak jakitea oso zaila da, gaiaren konplexutasunagatik. Hainbeste ertz izatea baldintzatzen ditu eraso guztiak ez direla salatzen; indarkeria matxista zer den batzuetan ez dagoela argi; edo Datuen Babeserako Legearen zurruntasuna, indarkeria pairatu dutenak guztiz babesten dituelako.
Horregatik, hainbat iturriren datuak jaso dituzte: indarkeria matxista pairatu dutenentzako SATEVI telefonoarena (900 84 01 11); Ertzaintzan jarritako salaketak; udalaren gizarte zerbitzuetan egindako artapenak; eta osasun zentroetan jasotakoak. Datu horiek erkatu eta estimazioa atera dute.
Gabezien identifikazioa
Oro har baliabide eta tresna falta dagoela kexatu dira erakundeetako kideak. Toki eta espazio aldetik ere ez dabiltza soberakinekin. Gainera, profesionalek eurek trebakuntza handiagoa aldarrikatu dute. Erakundeen arteko protokoloen koordinazio falta ere nabarmena dela jakinarazi zuten. Eskualdeko protokoloa garatzea da beren lehentasun nagusia.
Indarkeria matxista jasan dutenei arreta zerbitzua eskaintzen dieten eragile horiekin biltzeaz gain, lotura estua duten beste hainbat talderekin ere aritu dira, datuak osatzeko. Antiju Morik, Killirikupe, Oiartzungo Feministen Asanblada eta Heltarekin elkartu dira. Eragile horiei jaso dietenez, herritarren sentsibilizazioan eta hirigintza-plangintzan ikuspegi feministatik eragiteko beharra dago.
Gainera, 2015etik Oarsoaldean martxan dabilen autolaguntza taldea ez dela nahikoa ezagutarazten adierazi zuten.
“Oiartzun ez dago libre”
Azterketako datuak eman ondoren, ondorioen txanda izan zen. “Oiartzun ez dago indarkeria matxistatik libre. Etxean, eskoletan, eremu publikoan… egoten dira indarkeria matxistako erasoak”, ebatzi zuen Iribarrek.
Indarkeria mota hori adin eta guztietako emakumeek jasaten dutela nabarmendu zuen Feminismo teknikariak. Salaketa gehienak 25 eta 49 urte arteko emakumeek egiten dituzte. Hor, baina, Iribarrek galdera bat bota zien pleno aretora hurbildu zirenei: “Zuek uste duzue 60 urtetik gorako emakumeen artean ez dagoela indarkeriarik? Bai, badago, baina ikusezina da eta isilpean geratzen da”.
Oraindik lan pila bat egin behar dela azaleratu zuen, eta egin denari errepasoa eman zion: ikastaro bana udaltzain, teknikari eta gizarte zerbitzuetako langileekin; hezkidetza kurtsoak ikastetxeetan…
Prebentzioa indartu
Indarkeria matxistaren kontrako neurriak hartzen ari direla jakinarazi du teknikariak. Hala ere, beraien azkeneko helburua arretarik ez ematea da, gizarteak indarkeria matxistaren gaitza gaindituta duelako. Horretarako, baina, prebentzioan eragingo dute.
Olga Leibar Feminismo zinegotziak azpimarratu zuenez, oraindik lan handia dago egiteko, baina ari direla urratsak ematen. Atzo aurkeztutako diagnosia izango da eman beharreko pausoen iparrorratza.
