Moda diseinatzaile handienak, gurean
XVIII. mendetik hasi eta gaur egunera arte modaren munduan aitzindari izan diren hamar diseinatzaile handienen historia batu du erakusketan Jantziaren Zentroak.
Erakusketa Jantziaren Zentroko beheko solairuan jarri dute. Jantziaren Zentroa eskaintza berri batekin dator. Ez da nolanahikoa, bihar bertan zabalduko du erakusketa berria, eta bertan, XVIII. mendetik hasi eta gaur egunera arte modaren munduan aitzindari izan diren hamar diseinatzaile handienen historia batu du. Icone, Modaren historiaren ikonoak goiburuarekin garai ezberdinetan bizi izan ziren diseinatzaileen proposamenak bildu ditu erakusketara. Garaian garaiko modaz harago, gaur egun inspirazio iturri dira oraindik ere ikono horiek, estilo propioa sortu zutelako.
Bihartik aurrera zabalduko dute erakusketa hori eta hamar diseinatzaile horien jantzi ikonikoen erreprodukzioarekin batera, haien ibilbidea ezagutzeko aukera izango da Kapitain Etxean.Hamar diseinatzaile horietatik sei dira gizonak eta beste laurak emakumeak, eta bakarra da euskalduna: Cristobal Balenciaga. Frantziakoak dira beste sei: Bertin, Lanvin, Poiret, Chanel, Dior, eta Saint Lorent; eta Espainiakoa, AEBtakoak eta Britania Handiko bana, Fortuny y Madrazo, Sybilla eta Worth.
Modaren munduan ikono bihurtu diren hamar diseinuez gain, 5 euroren trke, Jantziaren Zentroak argitaratutako lehen liburuxka eskuratzea dute bertaratzen direnek.
Erakusketarekin lotuta martxoaren 8an, Emakumeen Nazioarteko Egunean, bisita gidatu berezia egingo du zentroak, eta Bertin, Lanvin, Chanel eta Sybilla emakume diseinatzaileen gainekoa izango da. Doan izango da eta ordu erdiko b i saio antolatu dituzte 11:00etan euskaraz eta 11:30ean gazteleraz. Parte hartu ahal izateko aurrez izena eman behar da posta elektronikoz, edota Errenteriako Turismo bulegoaren 943 494 521 telefono zenbakira deituta.
Icone erakusketa hilaren 18tik martxoaren 29a arte izango da zabalik, larunbatetan goiz eta arratsaldez 11:00etatik 14:00etara eta 17:00etatik 20:00etara eta igandetan 12:00etatik 14:00etara.
