El Watan elkartea janaria biltzen ari da, Saharara bidaltzeko
Herriko ikastetxeetan ari dira bilketa egiten, baita Labore Oarsoren egoitzan ere. Hurrengo asteburuan Mamuten egingo dute bilketa.
El Wataneko eta Bixi-Bixiko kideak abenduan izan ziren Saharan. El Watan elkartea janari bilketa egiten ari da egunotan. Hala gogorarazi du Olga Leibar elkarteko kideak, Oiartzun Irratiak egin dion elkarrizketan.
Herriko ikastetxeetan ari dira janariak biltzen, eta ikasleek utzitakoa hilaren 27an jasoko dute. Ikastetxeetan ez ezik, Labore Oarsoren egoitzan ere utz daitezke jakiak. Horrelako bilketetan eskatzen dituzten janariak izan ohi dira: lekaleak, pasta, arroza, kontserbak, azukrea…
Horrez gain, bilketa bereziak egingo dituzte hilaren 31n eta otsailaren 1ean. Alcampon egongo dira El Watan elkartekoak, 09:30etik 22:00etara bitartean.
Horrez gain, Leibarrek gogorarazi du badirela bederatzi urte ura biltzeko bidoiak eramaten dituztela. Kalitatezko ura izatea edukitzea da helburua, eta gaixotasunak prebenitzea. Pasa den abenduan eraman zituzten Saharara El Watango oiartzuarrek eta Bixi-Bixiko sanjuandarrek.
Otsailaren 29an, bidaia
Kanpainan zehar Araba, Bizkaian eta Gipuzkoan jasoko dituzten elikagaiak kaxetan sartu, paleetan bermatu eta kamioietan sartuko dituzte. Kamioiak otsailaren 29an aterako dira, Donostiatik.
Alacanten elkartuko dira gainontzeko tokietako konboiekin, eta barkua betetzean aterako dira Aljerrera. Han sahararrek hartzen dituzte kamioak, eta errefuxiatu guneetan banatzen dituzte jakiak eta abarrak.
Otsaileko kanpaina
Bestalde, El Watan elkartea otsailean hasiko da udarako familiak bilatzen. Haur saharar bati basamortuaren gogorretik denboraldi batez ateratzen lagundu nahi duten familiak 605 71 36 92 telefono zenbakiaren bitartez jar daitezke harremanetan, baita posta elektroniko bidez ere. Otsailean, hala ere, emango dute —sakonago— kanpainaren berri.
