Grebari babesa emateko agerraldia egingo dute bihar
Oiartzungo greba batzordeak antolatuta, agerraldia egingo dute plazan. Gainera, hilaren 30erako prestatu duten egitaraua aurkeztuko dute.
Oiartzungo greba batzordeak deituta, agerraldia egingo dute bihar arratsaldean Done Eztebe plazan. Langile, emakume, gazte, pentsiodunak, langabeak, ikasleak, autonomoak eta nahi duen oro gonbidatu dituzte, grebari babesa emateko. 19:00etan geratu dira.
Bertan aurkeztuko dute hilaren 30eko egitaraua. Egun osorako ekitaldiak antolatu ditu greba batzordeak.
Horrez gain, bihar arratsaldean, eskola orduen ondoren, grebarekin zerikusia duen esku-orriak banatuko dituzte ikasleek.
Larunbatean, pentsiodunak
Etzi, berriz, pentsiodunek egingo dute agerraldia. 12:00etan elkartuko dira, Done Eztebe plazan baita ere. Grebarekin bat egiteko dituzten arrazoiak azalduko dituzte bertan.
Aste honetan zehar hainbat batzar egin dituzte. Asteartean Arraguako pentsiodunek bilera egin zuten. Atzo Elizaldekoen txanda izan zen, eta gaur elkartuko dira Altzibarkoak.
