Gazte Izanak Abadiñoko sanblasetara joango dira
Otsailaren 3an txango 'konpletoa' egingo dute jubilatu eta pentsiodunen elkartekoek: gosaria Durangon, feria Abadiñon eta bazkaria Mutrikun.
Abadiñoko feria ezagunenetakoa da.
Otsailaren 3an, astelehenarekin, Gazte Izanak jubilatuen elkarteak txangoa antolatu du Abadiñoko sanblasetara joateko.
Bizkai aldera 08:30ean abiatuko dira, Haurtzaro ikastolako aparkalekutik abiatuta. Abadiñora iritsi aurretik, Durangon egingo dute gosaltzeko geldialdia. Montorreta jatetxean sabela berdindu eta gero abiatuko dira Abadiñora.
Bertako ganadu eta baserriko produktuen —eta beste hainbat gauzaren— feria bisitatuko dute. 13:30 ingurura arte egongo dira Abadiñon, eta ondoren Mutrikuko San Juan jatetxean bazkalduko dute. Han bazkaldu ondorengo luzea egingo dute, 19:30ean bueltatzeko.
Izena eman nahi dutenek datorren asteko goizetan edukiko dute aukera. Gazte Izanak-en egoitzatik pasatu beharko dira interesdunak, 10:00etatik 12:00etara. Bazkideek 35 euro ordaindu beharko dute, eta 40 euro bazkide ez direnek.
Ziur erroskilla sorta on batekin bueltatuko dira Abadiñotik, baita eztarria babesteko hariarekin ere.
