'Amua' Poema bilduma argitaratu du Aritz Gorrotxategik
Joan den hilabetean ikusi zuen argia Gorrotxategiren azken lanak, eta aurretik, irailean, poema bilduma horrekin Irun hiriko Kutxa Literatura Saria irabazi zuen.
Aritz Gorrotxategi Zortzi urte ziren Gorrotxategik azken poema bilduma argitaratu zuenetik, eta Amua poesia bildumarekin heldu da orain. Joan den hilabetean ikusi zuen argia Gorrotxategiren azken lanak, eta aurretik, irailean, poema bilduma horrekin Irun hiriko Kutxa Literatura Saria irabazi zuen. Bizitzaren ikuspegi panoramiko bat egin du Donostian jaio eta azken urteetan Lezon bizi den idazleak; presentzia nabarmena du itsasoak bere azken lanean eta maitasuna zein erotismoa, arazo eta gatazka sozialak, edota heriotzaren itzala bildu ditu bere lanera.
Taxi bat Hamletentzat (2002), Zaldi hustuak (2007), eta Hariaz beste (2011) eta Muga (2018) poema liburuak argitaratu ditu aurretik Gorrotxategik. Narrazioan ere aritzen da eta Egurra Pinotxori (2002), Zer egingo dugu orain opariekin? (2016), Ahazten diren gauzak (2018) ipuin bildumak eta Kafkaren labankada (2000), Galtzontziloak autobusean zintzilik (2002) Kearen truke (2005), Axola ez duenean (2009) eta Koldar hutsa zara (2015) eleberriak idatzi ditu.
Irun saria irabazia da aurretik lezoarra: 2000. urtean eskuratu zuen, Kafkaren labankada eleberriarekin. 2012an, berriz, Espainiako Kritikaren Saria irabazi zuen Hariaz beste poema liburuagatik, euskarazko poesia alorrean.
