Bi futbol talde nagusiek hiru puntuak lortu dituzte
Nesken taldeak Arratia gainditu du, bizkaitarrek aukera garbiak huts egin ondoren. Mutilak gol batengatik nagusitu dira.
Iraide Pejenauteren gola ospatzen. Duela bi hamarkada inguru, Abreuren gola izeneko ez-gola boladan jarri zen. Aurrelari uruguaiarrak huts egite izugarria egin zuen, partida telebistarako narratzen ari zen esatariaren eztarriaren kalterako.
Larunbatean Karla Lekuona futbol zelaian eztarria urratuarekin bukatuko zukeen esatari horrek. OKEren neskek Arratiaren kontra jokatu zuten, eta igorreztarrek aukera oso garbiak huts egin zituzten.
Barkatzen duenak, baina, badaki zer duen. Partidak bizkaitarren bakarrizketa izan behar zuela zirudienean, oiartzuarrak suspertu eta pixkanaka hasi ziren talde horiaren atea inguratzen. Iraide Pejenautek ederki asmatu zuen Oiartzunentzako lehenengo gola lortzen.
Bigarren zatian, berriz, lan ona egin zuten, baina aukera gutxi batzuk sortu zituzten. Horietako batean aldea handitzea lortu zuen Miren Unzuetak.
Pejenautek atezaina gainditu zuen jokaldia.
Bolada ona darama Oiartzunek. Azken bederatzi jardunaldietan partida bakarra galdu dute —aurreko asteburuan—, eta zortzigarren postuan daude, 24 punturekin. Gora begiratzea gehiegi esatea izango litzateke, baina behintzat sailkapenaren putzu iluna urrun dute.
Garaipen polita
Mutilek, berriz, bolada txarrarekin bukatu dute. Zarautzi hiru gol sartu zizkioten atsedenaldira heldu baino lehen, baina bigarren zatian gauzak zaildu ziren. Zelaira irten eta berehala sartu zuten lehenengo gola.
Partida bukatzeko ordu laurden falta zela, Loperena oiartzuarra kaleratu zuen epaileak, baina, hala ere, oiartzuarrek aukera onak eraiki zituzten aldea handitzeko. Bukaeran zarauztarrek bigarren gola sartu zuten. Garaipenak azken postua atzean uzteko balio izan die.
Eta horratx futbolak utzi dituen albiste pozgarri bakarrak. Gainontzeko hiru taldeek galdu egin zuten.
Beste kiroletan, berriz, aurkia eta ifrentzua. Areto futboleko bi taldeek garaipena lortu zuten, eta saskibaloikoek, berriz, porrotekin bueltatu ziren Tolosatik.
FUTBOLA
Gizonen Erregional Ohorezko Maila
- Oiartzun — Zarautz: 3-2.
Emakumeen Lehen Nazionala
- Oiartzun Antiguoko — Arratia: 2-0.
Gizonen Erregional Preferentea
- Oiartzun — Ostadar: 0-2.
Emakumeen Euskal Liga
- Oiartzun Intxaurdi – Eibar: 1-2.
Emakumeen Gorengo Maila. Igoera Fasea.
- Amaikak Bat — Oiartzun Intxaurdi: 2-0.
ARETO FUTBOLA
Gizonen Gipuzkoako Lehen Maila
- Oiartzun — Gaintxu: 3-1.
Gizonen Gipuzkoako Bigarren Maila
- Gorka Margoak Makax — Miren Taberna OKE: 3-7.
SASKIBALOIA
Gizonen Gipuzkoako Lehen Maila
- TAKE Orbela Taberna — Oiartzungo Saskilagunak: 77-56.
Gizonen Gipuzkoako Hirugarren Maila
- TAKE Coach — Oiartzungo Saskilagunak: 56-36.
