Hamar urte lantokiko praktikak euskaraz eskaintzen
Hamar urte bete dira Oarsoaldean Lanbide Heziketako praktikak euskaraz egiteko aukera eskaintzen hasi zirenetik. Ordutik, 200 ikasle baino gehiagok praktikak euren hizkuntzan egin dituzte.
Gema Ces (Pasaiako Blas de Lezo Itsas Eskolako kidea), Loreto Osa (Pasaiako Udaleko zinegotzia), Ruben Corrales ikaslea, Itziar Ostolaza (Errenteriako Udaleko zinegotzia) eta Carlos Lizarbe (Don Bosco). Hamar urte bete dira Oarsoaldean Lanbide Heziketako praktikak euskaraz egiteko aukera eskaintzen hasi zirenetik. Oarsoaldea Garapen Agentziaren egitasmoz heldu zen aukera, eta ordutik, 200 ikasle baino gehiagok praktikak euren hizkuntzan egin dituzte. Gaur berriz, Don Boscon, agentziako zein udaletako ordezkariak aurtengo ikasturteari begira jarri dira, ikasle euskaldunek ikasturte honetan izango dituzten aukeren berri emateko.
Egitasmoan parte hartu ahal izateko enpresek bete beharreko baldintza nagusia instruktore euskalduna izatea da. Honek ikasleak gidatuko ditu egunerokoan, eta gainera, lan egiteko ingurunean errotulazio eta seinaleztatzea euskaraz egiteko urratsa emango du. Horrez gain, egunero idatziak, lan aginduak, parteak eta abar euskaraz izatea ahalbidetuko du instruktoreak.
Egitasmoa zazpi enpresarekin hasi zela nabarmendu dute gaurko agerraldian, eta egun, 28 enpresak direla praktikak euskaraz eskaintzen dituztenak. Ondorengoak dira: ABB Niessen, Papresa, CAF (Irun), IDK Elektronika, Easo Motor, Lurauto, Linke, Camara, Ekonek, Suministros Itxaso, Lucretia, Txingura Tailerrak, Tecnalia (Miramon), Dardarak, Pamendi tailerrak, Beissier, Azti, Fraisoro, Errotek galdaragintza, Itxas Zerbi eta Kotacero.
«Oarsoaldeko lau udalontzat berebiziko garrantzia dute lantokiko praktikek. Batetik, euskaraz egindako lanbide ikasketei, lan mundurako jauzian, azken erremate eta, gure iritziz, hizkuntzari dagokionez erabakigarrienean, euskaraz jarraitzeko aukera bermatzen dutelako», diote garapen agentziako kideek. Etorkizunari begira ikasleen kopurua handitzea dute helburu nagusi, baina baita ere enpresen kopurua.
Iaz praktikak euskaraz egin zituen ikasle bat ere izan da agerraldian. Ruben Cuadrado gazteak aitortu du «oso baliagarria» egin zaiola praktikak euskaraz egitea. «Eroso sentitu nintzen instruktore euskaldunarekin. Bide honetatik jarraitu beharra dagoela iruditzen zait, errealitate hau gero eta sendoagoa izateko», adierazi du.
