'Kontzejutik' udal aldizkaria, diseinu berrituarekin
Gotti Betti hilabeteko agenda gero eta aberatsagoa delako aldatu dute formatua. Etxez etxe banatuko da, ohi bezala.
Agendak espazio handiagoa izango du aurrerantzean. Udalak oiartzuarrekin harremana izateko bideetako bat da Kontzejutik udal aldizkaria. Urte hasierarekin batera, diseinuari buelta bat eman eta itxura berritu diote.
Aldaketa hori egiteko arrazoi nagusia Gotti Betti agendaren aberastasuna da. Izan ere, gero eta gehiago dira herriko eragileek antolatzen dituzten ekitaldiak, eta horiei ikusgarritasun hobea eman nahi diete.
Aldatuko ez dena da hilabetero etxez etxe banatuko dutela. Oiartzungo kontuen berri izan nahi dutenek eta herrian bizi ez direnek, udalaren webgunean aurki dezakete Kontzejutik aldizkaria, Iragarki Taulan. Aski Prexko eta Udala Informatzen aldizkariak ere bertan aurki daitezke.
