Gudarien Basoari eraso egin diotela salatu du amnistiaren aldeko mugimenduak
Espainiako Auzitegi Nazionalak 2014an agindu zuen kentzea, eta iazko irailean berriro landatu zuten. Pasa den astean kaltetu zuten.
Irailean landatutako zuhaitzak eta plakak kaltetu dituzte. Amnistiaren Aldeko eta Errepresioaren Aurkako Mugimenduak (AAMk) jakinarazi duenez, Aritxulegin landatutako Gudarien Basoari eraso egin diote.
2014ko ekainaren 3an, Espainiako Auzitegi Nazionalaren aginduz, hainbat oiartzuar atxilotu zituzten, eta Gudarien Basoa desegin zuen. Bost oiartzuarrei epaiketa egin, eta kargurik gabe aske utzi zituzten.
Aritxulegiko basoa berriro landatu zuten pasa den urteko irailean, igorle anonimo batek AAMri bidalitako bideo baten bidez jakinarazi zutenez. 2019ko Gudari Egunaren testuinguruan landatu zituzten zuhaitz haiek.
Ekintzaren egileek mugimendu horri helarazi diotenez, kalteak jasan ditu basoak. “Hilabete batzuk beranduago, landatutako haritzak deuseztatu dituzte. Bere garaian Guardia Zibilak bahitu zituen zuhaitzak Espainiako Entzutegi Nazionalaren aginduz. Ez gintuzke harrituko zuhaitz hauen aurkako eraso berri hau beraiena izateak”, gaineratu dute.
Iragarri dutenez, ez dira kikilduko: “Gudarien memoria gordetzen jarraituko dugu. Euskal Herriaren alde dena eman zutenei, dena diegu zor!”.
