'Manifestu bat', iganderako antzerki proposamena
Oiartzungo Antzerkizaleen Elkarteak hilero antolatzen duen saiora Beheko Larraine antzerki taldea gonbidatu dute.
Miren Tirapu da obraren aktore eta zuzendaria. Oiartzungo Antzerkizaleen Elkarteak antzezlan baten emanaldia antolatzen du hilabetero. Otsailari dagokiona datorren igandean izango da, 19:00etan, pleno aretoan. Beheko Larraine antzerki taldea gonbidatuko dute, Manifestu bat antzezlana taulara dezaten.
Honakoa da Manifestu bat antzezlanaren sinopsia (behean fitxa teknikoa):
“Mila esker nire hiletarako gonbidapena onartzeagatik. Festa eder bat prestatu nahi nuen nire azkenerako, baina azkenean…”.
Azkenerako eta azkenean. Beti bazterreko pertsonaia bat baino izan ez denak, azkenean, arreta bereganatuko du antzezlan honetan. Bere barne-ahotsek, behingoagatik, begirada guzien erdigunera bultzatuko dute. Bueltan, bere begirada itzuliko digu. Nolako begirada, halako errealitatea. Begirada ironikoa heriotzari bizitzaren gorabeherak erakutsiz. Zerbait erakutsiko digu azkenerako?
Zuzendaritzatik Pertsonaia bat, istorio bat, hiru ahots. Kontraesanak abiapuntu nagusitzat hartuta, hitza eta ekintza batera sortzen joan dira. Umorea eta kritika izango dira lan honen euskarri nagusiak. Bi elementurekin osatutako eszenografiarekin, aktorearen jokoak arreta bereganatuko du. Publikoak gonbidatuen papera hartuz, harreman estua eta intimoa sortuko da.
• Zuzendaritza eta aktorea: Miren Tirapu Goikoetxea.
• Idazlea: Gaizka Sarasola Iarzabal.
• Argi diseinua: Andoni Mendizabal Andonaegi.
• Argazkiak: Itziar Matxain Urra.
• Kartela: Araiz Mesanza Iturritxa.
