'Erik eta Win', Ander Lizarralderen Buhameak taldearen ikuskizun berria
Diziplina asko biltzen dituen ikuskizuna da, eta ostiralean estreinatuko dute Donostian. Harreman intimoak ditu oinarrian.
Ostiralean estreinatuko dute ikuskizuna. Imanol Kamio eta Aitor Atxega musikariek, eta Unai Muñoa eta Ander Lizarralde bertsolariek osatzen duten Buhameak taldeak ikuskizun berria prestatu du: Erik eta Win.
Sei urte baino gehiago dira Ez gara Palestinaz ari lana estreinatu zutenetik, eta esperientzia aberasgarri horren ondoren, bigarren ikuskizunari heldu diote. Datorren ostiralean —hilak 7— izango da lehenengo emanaldia, Donostiako Lugaritz kultur etxean. 20:00etan hasiko da, eta sarrerak esteka honetan eros daitezke.
Antzezlanari izena ematen dioten pertsonaiak etxe berean bizi dira, eta haien arteko harremanari begirada ematen diote Lizarraldek eta Muñoak: Nola erakarri ziren, nola nabigatu duten botere harremanetan, nola elkar lagundu duten, nola lehiatu duten, zein nolako harremanak izan dituzten emakumeekin eta nondik nora hurbildu zatzaizkien, nola ezkutatu eta agertu dituzten zenbait desio eta behar emozional…
Gizon izatearen eta haien estereotipoen gaineko hausnarketa egiten dute ikuskizunean, umore ukitu handiekin. Bertsoa, antzerkia, musika, poesia eta abarren arteko diziplina nahasketa da Erik eta Win.
