Zuhaitzen kimaketa bertan behera utzi du udalak "egoera aztertu" bitartean
Euskal Herria Plaza eta Elias Salaberria hiribideko zuhaitzen kimaketa herritar batzuen eskaera zuzenari erantzuna emateko xedez hasi zela dio udalak komunikabidetara helarazi duen prentsa ohar laburrean.
Hautsak harrotu ditu azken egunetan Euskal Herria plaza eta Elias Salaberria plazako 22 zuhaitzen kimaketak. Udala kimaketa lanak egiten hasi zen, baina EH Bilduk lehenik, eta Zuhaitzen Lagunak taldeak ondoren, gogor salatu zuten udalaren jarrera. Kimaketa egiteko arrazoirik eza dagoela esan dute koalizio subiranistak lehenik, eta Zuhaitzen Lagunak taldeak ondoren, eta hori baieztatzeko, lorezaintza lanak egiten dituen enpresako adituen txostenari, eta ingurumen teknikariaren txostenari erreparatu diote.
Zuhaitzen Lagunak taldeak, gainera, zuhaitzen hostajeak, ondoko errepidean dabilen auto kopuru handiak sortzen duen CO2 partikula kopuru handiaren isuria xurgatzen duela esan dute. Kimaketa gelditzeko ekintza egin zuten joan den larunbatean, eta taldeko bi kide zuhaitzetara igo ziren; gaur, berriz, Gurutze Santuaren plazan elkarretaratzera deitu dituzte herritarrak 19:30ean zuhaitzentzako “errespetua” eskatzeko.
Atzo salatu zuten EH Bildu koalizioak, eta Zuhaitzen Lagunak taldeak kimaketen gaineko afera, eta horren harira prentsa ohar laburra helarazi du Lezoko Udalak komunikabideetara. Euskal Herria Plaza eta Elias Salaberria hiribideko zuhaitzen kimaketa herritar batzuen eskaera zuzenari erantzuna emateko xedez hasi zela dio oharrean. Azken egunotako gertakarien aurrean eta jasotako txostenen medio, ordea, kimaketa bertan behera utzi duela erantsi du, “egoera aztertu eta zein erantzun eman erabaki bitartean”.