Zuhaitzentzat "errespetua" eskatu dute
Zuhaitzak ez kimatzeko eskatu dute hainbat herritarrek elkarretaratze baten bidez.
Atzo egin zuten elkarretaratzea Gurutze Santuaren Plazan. Euskal Herria Plazan eta Elias Salaberria hiribidean 22 zuhaitz kimatzeko asmoa zuen udala, eta horren aurka azaldu dira EH Bildu koalizioa eta Zuhaitzen Lagunak taldeak. Bi talde horien kexak, hautsak harrotu ditu eta atzo bertan jakinarazi zuen udalak, udal ingurumen teknikariak egindako kimaketaren kontrako txostena, eta lorezaintza lanak egiten dituen enpresako teknikariaren kimaketaren kontrako irizpideak aintzat hartuta, bertan behera utziko dutela kimaketa, behinik behin, arazoa aztertzen duten artean.
22 zuhaitz horien kimaketaren aurka, elkarretaratzera deitu zuen atzo Zuhaitzen Lagunak taldeak. Herriko plazan bildu ziren zuhaitzentzat “errespetua” eskatu eta aldaketa klimatikoari aurre egiteko neurriak eskatzeko. Udalak kimaketa lan horiek bertan behera uztea dute helburu.
