Alkateak Zaldunbordaren mozioa aztertzeari uko egin ziolako, kexu Lezoko EH Bildu
Lezoko EH Bildu haserre dago, alkateak eragotzi zuelako Euskaldendak-ek aurkeztutako mozioa azken udalbatzarreko gai ordenean sartzea,
Zaldunbordan egin nahi duten merkataritza gunearen promozio irudia. Hilaren 5ean egin zen Lezoko Udaleko zinegotzien osoko bilkuran, Zaldunbordaren gainean Euskaldendak-ek (Euskadiko Merkatari, Ostalari eta Zerbitzu Enpresen Elkarteen Konfederazioa da)aurkeztutako mozioa gai ordenean sartzeari uko egin ziola salatu du Lezoko EH Bilduk, “Zaldunbordako outlet-ari buruzko eztabaida eragotzi zuen alkateak”. Koalizioko eledunek azalpenak eskatu zizkioten Jesus Mari Martiarena alkateari, “ez genuen inolako erantzunik jaso. Oraingoan ere, gure galderen aurrean, Martiarena alkateak mutu jarraitu zuen, azalpenik eta arrazoirik eman gabe”.
“Ostrukarena egitea” egotzi diote alkateari, “harrigarria, kezkagarria iruditzen zaigu alkateak eta EAJ-PSE gobernu taldeak mozioa osoko bilkuran eztabaidatzea ukatzea”.
Lezoko EH Bilduren ustez, Gaintxurizketako Zaldunbordan egin asmo duten outlet herrixkak zuzenean eragingo die Lezoko eta inguruko herrietako komertzioei, “hauen egoera gehiago zailduz. Bertako merkataritzarekin, herriko denda eta komertzio txikiaren ereduarekin talka egiten du”. Oroitarazi dute 28.000 metro koadro eraikiko merkataritza gunea dela Hondarribiak Gaintxurizketan dituen lur horietan egin nahi dutena, 1.800 autorentzako aparkalekuarekin.
Koalizio subiranistako kideek bere egin dute Dendartean-ek (Gipuzkoako Merkataritza Elkarteen Elkartea) mozioan islatua zuen testuarekin. Bertan idatzita dago, Europan egindako azterlanetan jasota dagoela gisa horretako merkataritza zentroek sortzen duten lanaren bikoitza suntsitzen dutela, “gainera, enplegu prekarioa bultzatzen dute, eta lehia desleiala sustatzen dute, zentro horiek ez baitute gure lan akordioa aplikatzen, Estatuarena baizik”.
Testuinguru orokorretik, Lezokora begira jarri da EH Bildu. Eta Zaldunbordako egitasmoari begirako hiru eskaera egin dizkio gobernu taldeari. Honakoak dira, hitzez hitz:
- “Bertako merkataritza, herriko denda eta komertzio txikiak, guztiok elkarrekin defenda ditzagun halako mega-proiektuen aurrean”.
- “Hondarribiko Udalari Zaldunbordako outlet proiektua behin betiko bertan behera utz dezala eskatzea”.
- “Euskaldendak-ek aurkeztu zuen mozioa osoko bilkuran eztabaida dadila”.
