[Galeria] Sorgin, basandre eta intxixuek beren legea ezarri dute
Ihoteak hasi dira ofizialki. Auzoetako koloredun bandera jarri dute udaletxean, eta festa giroa nagusituko da igandera arte.
Intxixuetako bat, nork aginduko duen erakusten. Iritsi da askok itxarondako momentua: ihoteak hasi dira. Arratsean iritsi dira, Kataxulotik, intxixu, basandre eta sorginak, eta Oiartzungo plaza berentzako hartu dute. Herriko auzoetako koloredun banderak elkartu, eta udaletxean jarri dituzte denak elkarrekin.
Beren legeak aginduko du igande arratsera arte. Done Eztebe plazaren konkista baino lehenago, baina, egon da zer ikusi. Arratsaldean, Haurtzaro Ikastolakoek ikuskizuna eskaini dute, eta ondoren burrunba egiten igo dira plazaraino. Han edari pizgarria edan dute: txokolatea.
Jende pila bat hurbildu da Oiartzungo plaza nagusira, azeri dantza zein sokadantza bertatik bertara ikusteko. Ondoren iritsi da intxixu, basandre eta sorginen txanda (iaz hil zen Ion Zabaleku Zapo presente izan dute). Petra Lekuonako bidea hartu dute aurten, festaren sua ekartzen. Igandera arte ez da itzaliko: horretaz arduratuko dira taberna eta beste txoko batzuk bete dituzten ehunka oiartzuarrak.
Bihar
- 09:00etan. Kuestazioa, auzoetan, poxpolinez jantzita.
- 14:30ean. Bazkaria, bakoitza bere auzoko elkartean.
- 18:00etan. Auzoetan ibilitako kuadrillak plazan elkartuko dira. Ondoren, musika eta festa giroa txosna inguruan.
Etzi
- 09:00etan. Txistularien diana.
- 11:00etan. Karroxa eta kalejira alaia, Beheko Plazatik aterata.
- 19:00etan. Intxixu, basandre eta sorginei agurra. Bukatzeko, suzko akerra.
